以為異鄉人總是心繫家鄉，喬寶寶嘅家人有的回鄉、有的移民，但佢就話打死都唔走：「香港真係乜都有，喺度我又唔使戒口，家鄉幾乎唔可以食的豬同牛，喺度想點煮都冇問題。」寶寶講得性起，仲話要教大家乜嘢係正宗印度菜！
記者︰劉昱蘭
攝影︰伍慶泉
鳴謝︰甘地印度餐廳（29888674）
地址︰大嶼山東涌下嶺皮村8號
咖喱雞加茄汁香而不辣
價錢︰$25/2人
需時︰10分鐘
印度人多是素食者，只有喜慶先會食雞肉，羊肉就要大Party先有得食。回教徒絕不吃豬，牛更奉若神明，劏嚟食就好似劏自己阿媽咁殘忍；寶寶話喺香港唔使戒口，好幸福！細個時佢一聽到有雞食就開心到跳舞，所以就算𠵱家乜肉都有得食，但最愛仍是正宗印度咖喱雞。
材料︰
雞肉100克、洋葱50克、蛋1隻、番茄50克、黃薑粉及辣椒粉半茶匙、淡奶油及花奶1湯匙、番茄汁2湯匙、GaramMasala、芫荽及牛油少許。
雞肉$10/磅（a）
番茄$5/斤（a）
洋葱$1/100克（b）
簡易法
1.烚蛋切片，洋葱切粒再炸；GaramMasala、黃薑粉及辣椒粉醃雞肉，拌勻後加少許芫荽；
2.番茄汁及炸洋葱落鑊，加雞煮至9成熟，放入芫荽、牛油及其他材料略煮，最後淋上淡奶油及花奶。
貼士︰GaramMasala冬天有驅寒作用，但夏天就要留手，消化不良者食完會放臭屁。
咖喱椰菜花入口即溶
價錢︰$20/4人
需時︰20分鐘
雖然寶寶鍾意食肉，但話晒屋企人都係食齋，每餐通常都係少肉多菜，椰菜花係佢最愛，最鍾意用咖喱汁，煮到佢好似朱古力溶喺口就最正！
材料︰
青辣椒30克、薯仔50克、番茄50克、椰菜花100克、洋葱70克、GaramMasala、鹽及辣椒粉半茶匙、番茄汁2湯匙
薯仔$2.4/100克（b）
青辣椒$3/4両（a）
椰菜花$6/斤（a）
簡易法
1.青辣椒、薯仔、番茄及洋葱切粒，洋葱以滾油炸；
2.青辣椒、番茄及炸洋落鑊，加入椰菜花、薯仔及番茄汁；
3.椰菜花煮腍，加入GaramMasala、鹽及辣椒粉。
貼士︰如果想辣啲，可以加多啲青辣椒。
白汁時蔬食完唔會臭
價錢︰$20/4人
需時︰20分鐘
寶寶最想教大家煮咖喱黃豆，不過為大家着想，咖喱變白汁，黃豆變青豆！點解？有次佢朋友腸胃唔好，但食咗好多咖喱黃豆，食飽搭的士，司機開窗喪叫︰「邊個放沙林毒氣？」搞到成車人笑得半死。
材料︰
紅蘿蔔50克、青豆100克、蘑菇80克、番茄50克、椰菜花50克、豆角50克、腰果50克、淡奶油、花奶各50克
蘑菇$9/2包（a）
紅蘿蔔$3.4/100克（b）
青豆$5/包（a）
簡易法
1.腰果浸水，加入淡奶油及花奶各2湯匙，靜置15分鐘成白汁；
2.紅蘿蔔、青豆、蘑菇、番茄、椰菜花和豆角切粒。以剩餘淡奶油和花奶起鑊，放入切粒材料略煮，最後加入白汁炒勻。
貼士︰唔怕肥，落淡奶油及花奶時，可再加10克白芝士，味道更香濃。
NaanBread薄餅當飯食
價錢︰$3/1人
需時︰15分鐘
中國人無飯不歡，印度人則不可一日無NaanBread。在餅面撒上黑楜椒及芫荽就咁食又得，包住啖啖肉蘸咖喱食亦得，變化多端。
材料︰
蕎麥粉200克、水半杯
蕎麥粉$22/500克（b）
簡易法
1.水開蕎麥粉搓成粉糰，再分成小球；
2.麵粉轆壓平，左右手交替撻平；
3.將薄如紙麵糰放平底鑊，煎至拱起小圓球即成。
貼士︰手拍薄塊餅無寶寶咁好手勢？用麵粉轆壓都可以過到骨。
印度煎堆甜到漏
價錢︰$7/1人
需時︰25分鐘
中國式炸煎堆就見得多，用奶粉整煎堆就真係未試過，味道新鮮濃烈，以糖漿浸住食，奶味重又甜到漏，又幾過癮喎。
材料︰
白牛油100克、奶粉250克、糖漿250克、梳打粉5克、鮮奶200克、麵粉500克、杏仁及銀葉少許
糖漿$16/454克（b）
麵粉$5.2/454克（c）
鮮奶$17.9/946毫升（c）
簡易法
1.杏仁切碎，以鮮奶溝奶粉、麵粉、白牛油及梳打粉，開好粉糰搓小球；
2.麵團炸至金黃，以糖漿浸住，在煎堆面加上一小塊銀葉及杏仁粒即成。
貼士︰炸煎堆時，油要蓋過煎堆，才可以炸得透。
印度餐桌禮儀話你知
1.男女分開坐
如印度人請你到家作客食飯，千祈咪亂坐！因為佢哋男女分開兩邊坐，男人要食完先，女人殿後；客人就不分男女可與男士一起先吃（不過一樣要分開坐）。
2.食餐喜用匙羹叉
其實印度人同西方人嘅飲食文化好睇齊，食嘢喜歡用匙羹同叉，不過就絕少會出動刀，叉住大啖咬都不知幾方便。
3.食薄餅先用手
印度人通常食薄餅先用手，但南印度人就連食飯都用手，所以食餐前最緊要起清主人家係邊「度」人，唔好亂「出手」呀！
（a）土瓜灣街市
（b）沙田新城市city'super
（c）土瓜灣馬頭圍道華潤超級市場
＊以上價錢以7月8日為準