無綫即將赴日本九州拍攝飲食節目《和味無窮》，主持官恩娜（Ella左）、李純恩（右）同鄭威濤噚日齊集尖東富豪九龍酒店舉行記者會，Ella仲穿上傳統和服現身，即場炮製拉麵比兩位男主持品嚐。 Ella自認大食同有膽識，最適合拍飲食節目，佢話：「我好多嘢都夠膽食，記得上次拍攝嗰陣介紹家禽類，我試過食雞肉刺身，重好味過食魚生，我重食過熟嘅馬肉，當時即刻諗起萬馬奔騰嘅場面，但有次去到北京成條街都係昆蟲，有蠍子、蜈蚣、生蝸牛，呢啲我就唔敢食。」