暑假流流長，除咗出國旅行、瘋狂shopping、歎spa，仲有咩好做？都市人物質生活豐富，想喺今個暑假為自己帶來重大改變，仲等咩？外展訓練當然係首選！今次我哋嚴選咗「外展訓練4激」：跳碼頭、爬繩網、野外定向同紮木筏，讓大家進入歷險之旅！更分成男、女子組進行2回合大激鬥！
記者：陳穎欣
攝影：陳陶鈞
第一回合：跳碼頭 畏高都去
挑戰：要由三層樓高嘅碼頭跳落海。
目的：考驗參加者嘅膽量，令佢哋知道以為無可能嘅事，只要肯嘗試都係有可能做到。
個碼頭有成兩三層樓高，參賽者即時嚇咗一跳。經過教練講解後，大家漸漸有信心，教練叫佢哋喺矮台試跳先感受一下，然後再上高台跳水，仲叮囑佢哋眼要望前，唔好望向下，踏一步出去就OK。終於由熟悉水性嘅阿Lo自告奮勇率先試跳。各人見阿Lo跳得咁過癮，於是都豁出去，結果全部順利完成，以阿Lo姿勢最放水花最少先勝一回！
第二回合：爬繩網 靠信心
挑戰：爬上10米高木柱，企穩再跳出去拍紅色波。
目的：增加學員對自己實現目標嘅信心。
眼見男子組先勝一回，女子組Kimi即不甘示弱，誓要喺繩網陣追番一回合。但此回合唔止考膽量，仲要考技術同彼此信任，絕非易事！不過教練會教大家把紅色波想像成一個好想達到但認為無能力做到嘅目標，將目標形象化成一件可觸及嘅物件，令學員感受到達成目標嘅能力和喜悅，提高對將來達成更高目標嘅信心。
挑戰勇士
野外定向要EQ
內容：由零開始，參加者由準備上山行裝到野外紮營煮食、用地圖找尋並到達指定目的地。
目的：考驗及提升各參加者嘅適應力、體力、毅力同意志力。
今回大家要分工合作，預備上山必需品，然後按各人能力分配要揹嘅物品同重量，考驗大家嘅智力和分析力。還有，唔少參加者會因太辛苦而想放棄，呢個時候就可以互相支持；而要充當領袖帶隊找目的地，亦好考個人組織能力同合作精神，鍛煉出超凡適應力。
紮木筏鬥智鬥力
內容：以木材、想像力和智力去紮一艘木筏。
目的：考驗團隊合作精神，智力體力都不可少。
紮木筏係一個鬥智鬥力嘅活動，尤其對10歲小朋友來講就更困難，而且更考彼此合作與默契。一般情況下，教練都只會提出項目任務，叫參加者於指定時限內完成，畀佢哋更多機會思考解決方法，考驗各人互相協調，學會溝通及接納。
課程查詢
香港外展訓練學校
地址：香港新界西貢大網仔
電話：27924333
網址： http://www.outwardboundhk.org/
交通：於西貢市中心乘坐94號巴士在仁義路站下車，沿對面小徑步行約10分鐘。
唔識游水都可參加
其實外展訓練並唔單止考膽量咁簡單，還透過陌生環境的挑戰，幫助個人發掘潛能，對於都市人嚟講，絕對係既可追求刺激、超越自我及反思嘅好機會。加上大人細路都適宜參加，就算你唔係運動健將，唔識游水都唔使擔心，因為外展訓練學校嘅教練全部受過專業嚴格訓練，而且所有項目都會做足安全措施，只要你係身體健康又想追求自我超越嘅就可以參加喇！
小學員心聲
