兒時見阿媽吃魚，由頭吃落尾連骨都啜個一乾二淨，阿媽說吃魚好：「你識食嘅話，魚嘴魚尾魚內臟乜都可以食一餐。」講到鯇魚嘴，別以為買魚尾搭送的魚嘴不值錢，今次由50年老字號的「強記」大牌檔師傅出馬，見他拿起大鑊又炒又焗，上枱一碟砵酒焗魚嘴又香又滑，就連魚尾、魚腸、魚鰾、魚腩都有得吃，喜歡大牌檔夠鑊氣的話，今晚就走一趟深水埗吧，保證你可以大魚大肉。
記者：黃若茵
攝影：伍慶泉
解說
「賣鯇魚尾––搭嘴」，這歇後語純粹玩諧音，話說以前師奶去街市買鯇魚尾，魚檔總會搭送多個魚嘴，因為魚嘴不值錢，師奶心態當然就卻之不恭！人說你賣鯇魚尾，即揶揄你喜歡搭嘴、多口，三唔識七都搭訕一番。
人在檔口在
碩果僅存的大牌檔「強記」是間鐵皮小屋，內裏燒着衝天烈火，幾位廚師並排爐前炒得滿頭大汗。「強記」持牌人是70多歲的曾老太，平日的她已甚少落舖，事無大小全交給6位子女處理：「食環處人員巡檔喇，我就會現身嘞，現身做乜？話畀人聽我仲生勾勾，確保牌照仍然合法。」即是說，哪一天曾老太不幸離世，大牌檔牌照不能轉手，「強記」便要關門大吉。
為此，一眾子女租下大牌檔旁邊的舖位，以便將來可以繼續家業，不過曾老太還是惋惜地說：「雖然搬入舖都可以做生意，但點都係坐街邊最有風味，鐵皮檔用石油氣爐，小炒特別夠鑊氣，咁先算係大牌檔，搬入舖就唔係呢回事，好可惜。」
做禡加鯇魚
談起鯇魚，曾老太面露笑容：「以前成家人同埋夥計每個月做禡兩次，食飯會加料整番條鯇魚，已經係好豐富嘅一餐，好滿足㗎。」曾老太大兒子兼大廚也愛吃鯇魚，還做出不同鯇魚菜：「鯇魚係河魚，泥味重，要煮得好就要加唔同材料辟腥，例如薑、XO醬、醋、紅棗咁喇。仲有呀，鯇魚肉質較鬆，所以要先用鹽同胡椒粉醃半小時，等魚肉收緊先唔會影響口感。」
砵酒焗鯇魚嘴$48
鯇魚嘴不算多肉，但個個街坊試食過都讚不絕口，師傅先炸魚頭，然後加入甜味重的砵酒焗至乾身，入口先嚐到陣陣甜味，仔細咀嚼，滑嘟嘟魚唇在口腔內鑽來鑽去，好有趣！
鹽水雲耳魚尾$45
師傅說：「魚尾多骨，所以一定要成條煮。」配料有雲耳、勝瓜、粉絲，芡汁很重海鮮味，每一條粉絲都鮮得似放入魚湯烚煮過一樣。
古法蒸魚腩$45
所謂古法是指配料的運用，師傅加紅棗、冬菇絲、金華花腿等蒸魚腩，令厚肉魚腩多一點鹹味：「加自製XO醬辟埋腥，魚腩鮮味更突出呀。
雞蛋焗魚腸$28
魚腸一定要用雞蛋焗，並非無創意，師傅話：「魚腸易散，要靠蛋嘅黏性將魚腸黐埋一齊先焗得成。」魚腸洗得乾淨，滑中帶爽。
薑葱枝竹鯇魚卜$58
十幾件魚卜，大大話話用上十幾條魚，成本很高。師傅說：「煮嗰陣加少少白醋，魚卜食起嚟先唔覺膩口，嗦嗦聲一啲都唔腥。」
搭嘴？唔明！
大牌檔買少見少
大牌檔源於二次大戰後期，當年很多公務員因戰殉職，政府為照顧其家屬生計，便發出牌照讓他們開檔維生，由於當年發出的檔口經營牌照面積比一般小販大，故稱「大牌檔」，又因檔口的椅子整齊地在街邊排列，故又有「大排檔」之稱，在60年代，政府共發出近3,000個大排檔牌照。
至80年代，政府以衞生環境欠佳易引起傳染病為由，不再發新牌照，現時法例訂明，除非獲得食環署署長的書面同意，否則不得將牌照轉讓，持牌人一旦死亡，牌照立即取消，目的是讓大牌檔自然流失，現在香港只剩下20多家大牌檔，將來想重拾童年時坐街邊歎美食的美好回憶，難了。
搵食攻略
強記（27762712）
地址：深水埗耀東街4號
營業時間：6:00pm-4:00am
交通：石硤尾地鐵站A出口，步行5分鐘左右
全店座位：60至80位，有街邊位及室內冷氣舖位
人均消費：約$50
最好賣：啫啫雞，一日賣至少30份