明日凌晨，四年一度踢足一個月嘅世界盃將會圓滿結束，但香港呢邊仍不愁寂寞，至少仲有李家二少澤楷嗰單世紀大刁（deal）頂住，大家絕對唔愁冇話題。話時話，單賣資產大刁都差唔多時候開估，街頭街尾都買重個賽果係「世上只有爸爸好」，由於八方冇份傾呢單刁，所以真係唔知個結局，但不妨趁呢個時間，同大家分享吓呢20日以嚟嘅所聽所聞。
只好留低字條
先由上個月19號講起，當二少話賣嘢係為小股東請命爆出嚟之後，頭一個禮拜，可以講二少佔盡主場之利，就算未真係為小股東做到嘢都已經型到爆！無他，因為搵勻全世界都應該唔會有人好似佢咁，夠膽公然挑戰阿爺！至於作客嘅網通，除咗回敬咗一張好嚴正嘅「反對」聲明畀二少，表面上真係冇咩動作，形勢上輸咗少少。
第二個禮拜，由於有人話人頭馬局長勁唔like二少所為，於是落order叫證監做嘢，黃牌一出，各個有份落場踢呢場波嘅人齊齊封嘴，但由於香港實在太多人鍾意做二少代言人，所以成街都係風，混亂程度前所未見。
同時喺呢個禮拜，中環花旗銀行廣場流傳出一個「超人搵仔」嘅笑話，大致係話二少幾日都唔肯聽超人電話，超人惟有親自踩上門，而二少收到風後，即刻掉頭唔返公司，於是搞到超人只好留低張字條云云！
超人愛將出手
踏入第三個禮拜，由於作客嘅網通堅持唔畀二少「和番」賣嘢畀洋人，於是開始流傳最後由超人出手做白武士呢個版本，同時亦不斷滲出不同嘅愛國富豪名字，話有意組團幫阿爺出頭搞掂，唔知仲以為報名旅行㖭。
不過，咁都可以理解嘅，話明阿爺吹雞，就算無水都要認吓頭，顯示吓愛國情操嘛！由於三號開完董事會後二少話冇結果，所以條街繼續有唔同嘅風，至噚日為止，最新版本係超人愛將梁伯韜同二少左右手袁天凡會出手……。
至於負責跟進呢單新聞嘅記者，直頭係上咗人生寶貴一課，由上個月19號二少間公司停牌日起，全部俾老細軟禁喺公司，仲要日日不停分析啲風係堅定流，完全係智力、耐性同體能嘅考驗，假如二少今個禮拜仲唔開估，咁就恭喜大家，因為仲可以經歷埋大肚婆「坐月」嘅生涯呢！