38歲的年紀，可有想過是時候由偶像派轉做實力派？伊健說：「呢樣嘢唔係我可以定到，喺外形上人哋已經幫我定咗，我唔係唔想拍啲考演技嘅電影，要睇吓有冇人搵你。我只可以斷定自己唔啱拍笑片，因為我講乜人哋都唔笑，咁都有好處嘅，起碼《我老婆唔夠秤》會搵我，《鹹蛋超人》會搵我，可能啲人覺得我有漫畫感，我係開埠以嚟拍特技片（如《風雲》）最多嘅演員。」
很多藝人返內地拍劇，但伊健卻說：「錢冇人嫌多，我唔拍係覺得個timing唔啱做呢樣嘢，我同林珊珊都好奄尖，杜琪峰講過香港要有人堅守，其實我都有咁嘅心態。」
以後不買樓
鄭伊健又謂自己也曾捱過，不過沒有呻而已，訓練班只得2,000蚊人工，曾經在TVB八廠不見天日地拍了兩年錄影帶（發行海外那些），直至簽了經理人合約，才有五位數字薪酬，做歌星時，還要借錢買衫。後來唱片賣到10多萬張，伊健荷包腫脹，然後發生了九七年買樓變負資產事件，伊健現時居住的匡湖居已供完，其他的也已甩身，他說若將來想搬，只會租屋住，伊健說：「其實無事一身輕，人好嘅時候唔係好長，今年搵得多，唔代表以後可以搵咁多，何況𠵱家供樓一供30年。」
不買樓、不買股票，伊健頂多買些穩陣基金，他說：「如果整定你嘅身家得3,000蚊，點搵點使到頭來都係得3,000，咁不如好好享受過程，買嘢、玩咗都好過輸咗呀。」