七月一日，58000香港巿民上街爭取民主、普選，理想還是很遠。扎根香港的模特兒姚書軼（Mikki），7.1忙於收拾行裝，離港飛到巴黎，迎接最光芒四射的一刻，她是全港第一個走巴黎HauteCoutureshow的模特兒，無數模特兒追逐一生的美夢，她在這一天的ArmaniPriveShow實現了。 巴黎直擊
來自上海，扎根香港的模特兒Mikki，沒有緋聞是非「關照」，沒有明星男友如黎明、吳彥祖，知名度遠遠不如樂基兒、LisaS.，非常反高潮，她的見報率卻出奇高企，隔三五天就會見到她的時裝專輯，心水清的，會記得只有她這張香港面孔出現於今年3月Chanel在邵氏影城舉行的Coutureshow。
悄悄走在屬於自己的舞台，這一天，光芒灑在Mikki肩上，上周成為香港第一個行巴黎Coutureshow的香港模特兒，被選中為Armani的高級訂做服ArmaniPrive騷任模特兒，而之前行過高級訂做服騷的香港人，只有N年前以明星身份行騷的張曼玉與梁詠琪。
Armani不容有錯
「你想怎樣行就怎樣行，不要posing，不要有表情，行慢些，給大家看清楚你身上的衫！」GiorgioArmani透過繙譯在後台對所有模特兒說。穿上一身黑色套裝的Mikki，與名模富永愛等站在其中，音樂響起，她深深吸一口氣，優雅行出台前，慢步細行，到盡頭轉身回去，完成她一生的夢想。
當天Mikki由清晨五時起床，到晚上回到酒店，興奮心情仍未平復，她說：「我唔會話冇乜嘢，因為我真係感覺好光榮，好自豪！呢個騷係一個世界性嘅大騷，雖然我之前都行過Couture，但係嗰啲係地區性，喺巴黎行Couture係所有模特兒一個終極目標，我好驕傲！我當然想再行啦，但凡事唔係自己控制到，尤其喺時裝圈。」
行騷無數的Mikki謂本地騷與國際天橋規則、氣氛當然無得比，行完巴黎的高級訂做服騷，她體會更深說：「我完全冇緊張，因為佢哋唔會畀你有出錯、唔靚嘅機會。Couture騷場充足準備嘅程度，係所有事都近乎完美，你唔會緊張，因為你嗰刻已經係最好！鞋底有防跣、甩咗線即時有人改，後台企滿人，好有條理咁區分，化妝、整頭、餐飲、十幾人嘅裁縫區、音樂組，一絲不苟，力求完美嘅態度，令人好感動。」Mikki更笑言全場最緊張應該是GiorgioArmani。
親歷大師發老脾
Mikki行Prive的日子，由上月底收到外國經理人公司NextModels的一封電郵開始，如海底撈針的黃金機會殺到，之後卻教她連夜發噩夢，她說：「法國人做嘢好隨心所欲，我開心完，佢哋一直冇回覆，我sent咗十幾個電郵都冇下文，以為唔通流嘢？直到7.1機票到手嗰刻，個心先定啲。」她帶了印上男友曾智超童年照的AnyaHindmarch銀包傍身，更在TinTin漫畫簿記下7.1開始的點滴。她說：「7月3號，終於見到Armani先生，佢拎住一張上次喺ChaterHouse做騷時嘅大合照，逐一對過models身形、樣貌冇走樣，先最後確認，好嚴格，好認真，啲staff安排錯模特兒畀佢對，佢仲發脾氣，估唔到佢70幾歲人仲咁好火。」
學基本功捱鬧
模特兒周遊列國，今日對Mikki是常事，回想起16歲時，她誤打誤撞加入上海一間模特兒學校，每日着8小時高跟鞋，狂拗柴兼俾導師鬧，她說：「以前喺內地做模特兒要領牌照，學基本功時，頂住本書喺頭頂行，背要直、肩要鬆，唔可以左搖右擺，仲要學拉丁舞、芭蕾舞，要考試。」
上天眷顧，17歲時Mikki的第一個工作就是為中國版《Elle》到西藏影相，當年帶着學生證、戶口證及家長信上飛機的往事，猶如昨日發生，她說：「我唔知今次行騷會唔會係我人生最高點，但係做模特兒，特別係喺香港呢四年，帶畀我前所未有嘅快樂！」
攝影：葉君海
採訪：梁錦貞
撰文：林妙萍
