滙豐大班鄭海泉噚日去港大李嘉誠醫學院做演講嘉賓，成班醫生乖乖坐低跟鄭大班學吓點投資。鄭大班話，亞洲嘅散戶經常犯四大錯誤：首先就係成日掛住追住啲熱門市場，但係又冇乜邊次成功；第二佢哋好想低買高賣，但就往往睇錯市；第三係唔識分散投資，淨係識買港股，相反歐洲基金、期貨及債券就冇人吼；第四亦係最重要嘅就係永遠唔信人，雖然自己唔係成日昅住個市，但就做晒所有投資決定，或者一窩蜂去抽新股，好少人會問吓投資顧問嘅專業意見。
不過，有個醫生明寸鄭大班話：「我四、五年前買獅子銀行嘅話，𠵱家都升咗成五成啦，但係港大基金幫襯個啲所謂嘅銀行顧問，每年都只係得一厘回報，點解仲要信佢哋先？」鄭大班當堂有啲口啞啞，只好兜圈堅持話，咁梗係要投資一啲有良好資產管理紀錄嘅顧問啦，或者買一啲可以瞌埋眼都唔驚嘅股票。鄭大班又話，投資其實唔應該咁貪心，但求有合理回報、跑贏通脹就算！
有醫生又追問佢自己嘅投資心得，鄭大班無奈話，知道太多股壇內幕消息，所以唔掂得投資啲嘢，惟有喺滙豐度打工做主席。佢雖然有好多滙豐股票喺手，但就唔會賣，因為好多條例限住，買賣都要申報，佢最驚就係人哋以為佢財政唔掂，要賣股謀生，咁樣好易整臭自己個朵，又或者市場以為滙豐唔掂，咁就大吉利是啦！