每見到一個唱得嘅藝人復出開Concert，就更感到時下樂壇之青黃不接；睇完陳奕迅，再睇埋今個禮拜新鮮出爐嘅《關於我關淑怡演唱會》DVD，充份感受到咩叫聽出耳油、咩叫真正感動，就算喺街見到碟舖Demo、就算見到令人鼻血直流嘅超露肉歌衫，筆者都忍手成個月唔買VCD版，為嘅都係等呢隻聲畫更佳嘅DVD版咋！
記者、攝影：許福合
對向以唱功見稱嘅關淑怡個唱DVD，筆者特別留意選歌方面，全套DVD一共分成3隻碟，一共收錄咗31首Shirley金曲，基本上收錄晒所有正歌，雖然DVD演唱會必定經過剪接，不過睇住Shirley由頭唱到尾，水準都可以Keep得好平衡，真不愧係唱家班之一，亦更增此碟收藏價值。
大賣唱功展歌喉
睇完全套DVD，發覺《關於我關淑怡演唱會》名副其實係一個「演唱會」，主要係大賣Shirley唱功，舞蹈員固然不會缺少，不過顯然並唔係鏡頭焦點，而嘉賓就有2位，Shirley邀請咗林一峰合唱《非愛不可》，當然唔少得即席搞笑一番，而陳奕迅亦有到來支援，上台合唱咗《親愛的》，兩人大展歌喉，由抒情慢版，唱到快版，而現場陳奕迅有獨唱一首《WeWillRockYou》，可惜並無收錄進DVD內，另外現場有播放一段黃偉文錄影片段，不過同樣未見於DVD內。值得一提係卡拉OK伴唱慣例依然有，其中超正歌《當世界無玫瑰》以往無出過卡拉OK版，今次就可讓Fans唱番夠皮。
現場氣氛一流
對於Shirley現場唱LiveShow演出，應可給予百二分高評價，雖然經過長時間休息，上到舞台仍然揮灑自如，毋須出動到華麗煙火效果，只憑一把聲就可以吸引住觀眾，所以現場觀眾亦特別「活力」，而且估唔到Shirley都幾識得搞氣氛，講到有關佢嘅報道，就話「作為一個女歌手、女兒同媽媽，我問心無愧!」，真情對話好得觀眾認同，經常會同Shirley來大合唱，睇碟都覺得現場氣氛相當唔錯，間中更會手舞足蹈，而Shirley亦唔孤寒，經常同觀眾握手打招呼，相當討人歡心，難怪觀眾開埋大光燈都唔願走！Shirley久休再上舞台，唱功仍在，唱到最後，Encore階段連氣都唔見喘吓，睇DVD版，音效好到聽CD一樣，效果好正。
Bonus：真情自白
演唱會之中，Shirley可以話完全滿足晒歌迷聽歌意欲，不過相對說話比較少，好多時都係一首一首咁唱落去，事隔多年Shirley應有好多嘢講先啱，所以喺Disc3就專登放咗一段真情自白，足足長達10多分鐘，由對佢唱歌事業、家庭、到演唱會前對佢傳聞，都算作出一個回應，雖然筆者睇起上來有啲唔清唔楚，亦可對佢有初步了解。Bonus內都有提及演唱會綵排情況，Shirley經常強調「用心去唱每首歌，將幸福快樂同歌迷分享」，難怪演唱會咁好氣氛。
$155（DVD）
