今年三月，鄭伊健和梁詠琪（GiGi）正式宣布六年情告終，那邊廂的GiGi近日已經收拾心情，重新投入工作。這邊廂的伊健分手後處處避談舊愛，似乎不想再因感情事影響彼此的事業，伊健對此說：「分咗手都唔會想人哋死㗎。」言談間流露維護GiGi之情。 撰文：張止寒
近日梁詠琪接受傳媒訪問，表示「奪麵雙琪」事件雖然有損形象，但對鄭伊健的這一段情今生無悔，因彼此曾經快樂過，所以和他再見亦是朋友。GiGi講伊健，講得很動聽也很煽情，但記者在伊健面前一提「梁詠琪」三個字，即如點中他的死穴般，很多時候，他會選擇說：「我真係唔想講。」
不想講，可能是受了當年和邵美琪分手時講多錯多的教訓，也可能是不想再因感情事而影響彼此的事業，不過在記者兜兜轉轉的探問下，心腸軟的伊健還是透露了些少……
（鄭：鄭伊健 記：記者）
記：有冇試過同朋友反面？
鄭：我唔係一個會嬲人好耐嘅人，當然人係有情緒嘅，我都會嬲，會憤怒，但隔一兩日就冇嘢，因為嬲一個人，會好傷神，好似朋友嗌咗交，一定要一個打電話畀另一個先，唔打就永遠記得仲嬲緊佢，我通常係打畀人嗰個。嬲一個人，自己辛苦時人哋又辛苦，中途如果再發生啲乜嘢事，又一定入佢數，其實嬲乜鬼呀，我幾嬲都會原諒一個人，我承認我係心軟，但係開心，做朋友係冇條件嘅，唔可以你一廂情願對人好，就一定要朋友對番你好，即使俾人出賣，咪減少啲來往囉，冇以前咁好囉，唔會連朋友都冇得做㗎。
溝通少致分手
記：咁你同梁詠琪仲係咪朋友？
鄭：吓！好難答喎……總之……係咯，唔想講。
記：你連朋友都唔會反面，何況GiGi同你拍咗咁耐拖？唔通真係做唔到朋友？係咪憎佢？
鄭：咁又唔一定要憎恨嘅，分手只係一個過程，好多人都分手，但分咗手都唔會想人哋死㗎。
記：如果有導演搵你同GiGi合作拍戲，會唔會抗拒？
鄭：咁個導演一定有問題，佢嘅出發點係乜先？我覺得咁嘅機會好少，係記者先會問，我唔係話抗拒，有先算啦。
記：你覺唔覺得相愛容易，相處好難？
鄭：每樣嘢要持久都係好難嘅，分開有好多因素，溝通少係其一啦，唉……我真係唔想講。
記：十幾年你未停過拍拖，冇拖拍覺唔覺得悶？
鄭：又冇話覺得悶嘅，係有少少轉變啦，𠵱家咪不停做嘢囉，對住公司同事、化妝師仲多過乜，我從來冇諗過有拍拖好定單身好呢個問題喎。
享受拍拖過程
記：𠵱家你想唔想拍拖？
鄭：冇得想唔想嘅，呢個係緣分，最緊要享受過程，每個人行嘅路都唔同，開唔開心，係睇你點睇。我算係感性嘅人，追求嘅嘢唔係好實質，鍾意感覺多過實際，可能因為咁，所以鍾意唱歌做戲。
記：有冇女仔埋你身？
鄭：咁又冇喎，唔覺。其實我嘅圈子都大㗎，要約朋友嘅話日日有，咁朋友又有朋友，不過佢哋冇特登介紹女仔畀我識喎，我自己識搵㗎啦。我不嬲唔係主動嘅人，拍拖永遠都係由朋友開始，唔會話覺得呢個女仔好靚，所以要追，好靚嘅女仔好多，個個要追咪好麻煩？今日畀我見到個靚女，望多兩眼咪算囉，咁又會覺得今日過得幾開心。如果女仔主動嘅話，都可以做朋友先嘅，睇吓點主動啦，當然話不投機就連朋友都做唔到啦。
唔抗拒圈中人
記：會唔會怕咗同圈中人拍拖？
鄭：係唔係圈中人唔重要，如果要嚟，（突然提高聲線）我係唔會怕嘅！就算另一半唔係圈中人，咪一樣會俾人跟。我亦唔會分析邊種女仔好，我每一段感情都幾年，拍拖嘅次數唔係咁多，所以分析唔到，最緊要係緣份。
記：分手之後，你好似多咗嘢做？
鄭：其實我不嬲都多嘢做，不過以前大家唔理我啫，我只係少咗唱片，拍嘢不嬲都有keep住。
攝影：陳偉權
後記：冧歌招來男Fans
問伊健，和GiGi分手後，是否多了女fans，伊健說向來都是男fans多，出到街多是男fans要求簽名合照，女朋友則企埋一邊，伊健說：「啲男仔成日話係唱我嘅歌，先追到個女仔返嚟㗎。」記者口快快說：「但原唱者衰咗喎！」伊健一臉無奈看着記者，其助手則在一旁偷笑。
