招積域：今晚就舉行世界盃決賽啦喎，你間餐廳有咩新搞作呀？
侍仔：我哋梗係有啦！即做「決賽美食套餐」，頭盤係法式焗田螺，主菜係肉丸意粉，仲有超過10種法式及意式小食，真係講得出嘅都有，你哋班死仔一定食到嘔！
菠蘿文：嘩！有咁多嘢食，你老細花好多本錢落去噃，但之前唔係話蝕到出血咩？
侍仔：老細話算數喎，佢話世界盃4年一次，最緊要大家開心。𠵱家佢仲話想趁決賽做埋夜晚一輪，希望賺番多少咁話。
招積域：咁我帶多啲朋友落嚟撐你場啦，叫佢哋食完一定要睇埋決賽先走。
侍仔：多謝晒喎！前晚普多斯基拎咗「最佳年輕球員」獎，我就覺得實至名歸啦，起碼佢唔會好似C朗咁成日插水先啦！
招積域：個個球員都插水㗎啦，唔扮嘢又點樣呃到着數返嚟？但C朗插咗咁多水，咁都冇俾球證罰黃牌，真係好出奇喎。
菠蘿文：你都有道理嘅，有邊個球員落場唔扮嘢㗎？忠忠直直咪又係呃唔到12碼同黃牌。
招積域：唯有話插水都係球賽嘅一部份啦，正如球證影響賽果一樣。決賽我撐法國，施丹真係令我着迷，估唔到個個以為佢臨尾香，但竟然重有夕陽餘暉！
侍仔：生死有命，富貴由天。正如招積仔你一直未開齋，都係整定嘅。
招積域：我買兩隊嘅中場同後衞「首名入球」，意大利揀森保達，法國揀韋拉，實行大包圍，一棍中晒即刻回本。
文：高洛文