應屆候選港姐還未上台鬥靚已先鬥緋聞，下月卸任的去屆冠軍葉翠翠也順勢加入戰團。上周二晚，手挽大袋重物的葉翠翠浪蕩灣仔，夜會情郎李逸朗，豈料中途被撞破，兩人即尷尬得各自打的速逃。
今年2月，本報率先踢爆05年港姐冠軍葉翠翠搭上曾參演無綫青春劇《當四葉草碰上劍尖時》的英皇歌手李逸朗（Don），還拍得男方摸黑竄上女方香閨短敍45分鐘。
礙於雙方事業未穩，報道一出之後，令這段地下情備受壓力，兩口子只得暗地裏維繫戀情。上周二晚約十時，一身沉色打扮、戴鴨舌帽及踢拖的葉翠翠，手挽一大袋重物，獨自現身灣仔莊士敦道，朝Don所屬的英皇娛樂總部進發。現場見她一邊講電話，一邊向途人問路，但因手持物品太重，加上行錯路，熱得汗流浹背、滿面油光，最後索性雙手捧起大袋而行。
正當慢如蝸牛的葉翠翠在鵝頸橋一帶「盲摸摸」之際，Don失驚無神從路旁彈出，只見他一身街坊裝打扮，跟女方一樣戴帽踢拖。當見到葉翠翠時，他即緊張地搶過女方手中的大袋，非常體貼。
撞破好事冇癮散水
不過Don未幾已察覺有記者在場，惟有勉強擠出笑容，又跟女方保持距離，葉翠翠則頭耷耷。之後Don硬着頭皮上前跟記者打招呼，問他是否約了葉翠翠？他說：「係，佢畀啲嘢我啫。」提到袋裏乾坤，他笑說：「好嘢嚟㗎！」續問他準備約女方到哪兒？他尷尬地說：「你喺度，你估我哋去得邊吖？你都繼續跟我㗎喇！」由於夜會再次斷正，Don只好沒趣地往街頭截的士，先送全程低頭避鏡頭的葉翠翠上車，然後才拿着那大袋愛的用品單拖打的回家。
採訪、攝影：娛樂突發組
