有人會說：「22個男人追住個波係咁踢到底係為乜？」然而足球運動確實魅力攝人，因為撇除球場上22個人爭波踢外，現在球場內外還有過十億人見證盛事。世界盃決賽將於香港時間周一凌晨二時舉行，自13歲起踢足球，後來擔任足球評述員的林尚義（阿叔），也會以這場球賽來終結其30多年足球評述員的生涯，再加上20餘年馳騁球場的歲月，難怪阿叔說：「我一生冇離開個波！」 撰文：卓美娟
事業：見證香港足球興衰
現年68歲的阿叔年輕時有重炮手及䱽魚等稱號，他表示一生人從未離開過他最喜愛的足球運動，他說：「13歲開始踢沙地小型足球，之後開始踢夏令盃，16歲加入甲組足球隊，掛靴後去考國際足協世界教練文憑，教過波，之後做足球評述員，一生人冇離開個波。我都想同𠵱家啲後生仔講，搵到自己嘅目標就要努力向前進發，唔好淨係坐喺度諗。」阿叔在58年代表中華民國勇奪亞運足球金牌，60年更於羅馬參加奧運，72年效力流浪時勇奪甲組聯賽及銀牌賽雙料冠軍，不久再由電台講波轉戰到電視台，此生人當真從未「甩波」。
回顧阿叔光輝的足球事業，也正好反映香港足球事業的興衰，曾幾何時香港被譽為亞洲足球王國，當年韓國隊與日本隊仍在踢業餘波時，香港已代表中華民國在奧運淘汰現今強隊意大利。與現今只餘十個、八個上了年紀的阿伯在旺角球場觀看球賽，昔日光輝日子顯然不復再。對於香港現今足球事業沒落，阿叔說：「以前我做球員嘅生活都仲過得去，的確近年香港球員嘅待遇比以前差，年輕人又唔好踢波、冇年輕球員、又冇人搞波，成個風氣都唔同晒。」
最難忘賽事...
阿叔被問到其足球員生涯的最難忘賽事時？他說：「打麥迪卡獨立盃攞金牌，同埋亞運攞金牌，呢啲都係畢生難忘嘅賽事。我自細就鍾意足球，踢波好講組織，同隊友幾乎日日見，所以球員之間有心病就冇得踢，係一項真係講求團體性同合作性嘅運動。亞運小組賽係被罰紅牌離場，對方踢我嘅隊友蝦仔（郭錦雄），我忍唔到頸咪踢對手囉，嗰個球員係韓國嘅于雙權。」
最難忘評述...
提到最難忘的足球評述的賽事時，阿叔說：「其中一場係喺大球場舉行嘅七人賽，有一個問題入球，足總要開會，開咗成半個鐘最後判個波入網，我嗰時喺電台講波，佢開半個鐘，我就講半個鐘古仔。仲有喺98年嘅世界盃，大會畀咗名單陣容明明冇朗拿度，但係球員出場時竟然見到哨牙仔行出嚟。」
阿叔98年在法國直播世界盃期間，被誤攝入鏡頭的吸煙場面至今仍在網上流傳，煙癮頗深的阿叔現今仍日抽兩包煙，見他鏡頭後總是煙不離手。無綫的錄影廠一向嚴禁吸煙，阿叔可能是唯一可以在無綫錄影廠抽煙的人，可見他地位超然。阿叔說：「我食呢啲係女人煙嚟㗎，好淡㗎，手癮大過煙癮，不過唔好講我食煙啦，費事教壞人啦。」
攝影：陳俊強
