港記者撐閉幕綵排
今屆世盃，國際足協大約批咗6千幾個記者證，但星期五係柏林進行嘅閉幕禮綵排，竟然只得30幾個登記傳媒出席；至於出席率最高嘅地區，各位又估唔估到呢？答案就係「豆腐膶」咁細嘅香港。事實上，連同有線幾位攝製隊人員，香港行家有10個記者到場，佔咗全部記者人數大約3分1。至於其餘5千幾個記者唔知又去咗邊呢？
李勇明
曾採訪世界盃、歐洲國家盃、奧運、亞運等大賽，身經百戰。
全國旅館坐地起價
曾經住過最平一間德國旅館，一晚39歐元，是青年旅館，有齊沖涼廁所設備，還包早餐，只是要轉幾百次車才到，室內面積更細得像日本旅館，即是伸一下腳就轉到電視的台。本來也想食過翻尋味，只是撞正世界盃決賽機會，又正值周六、日，加價加到離晒譜，連青年旅館也升價三倍。心有不甘下找到圖中這間近市中心車站外的旅館，升幅只是1倍，你猜價錢多少？
徐嘉華
採訪過無數大賽，最鍾意捐窿捐罅搵題材，今次德國之行啱晒我。
贊助商世盃搵快錢
香港人醒目，最叻搵快錢；但咪睇歐洲人生活節奏咁慢，原來搵快錢都有一手。兩場準決賽打完無幾耐，贊助商好快手咁已經推出咗世界盃決賽T恤，周街有得賣，T恤上有埋對賽兩個國家國旗圖案，呢啲睇怕無得整定啩！T恤定價約200港元，抵唔抵買見仁見智，我睇過多兩日至幫襯，分分鐘仲可以平啲㖭。
朱冠恆
肩負現場直擊畀料重任，無論你當我名家抑或明燈，都希望交到功課。
