世界盃決賽果然一如左丁山所料（見七月五日本欄），由意大利對法國，比賽喺七月十日星期一凌晨兩點（香港時間）舉行，呢場波唔睇唔得，聽日朝早返工，飲多幾杯咖啡啦，希望啲老闆唔好介意職員瞌眼瞓。
左丁山落注法國贏巴西，落注法國贏葡萄牙，落注意大利贏德國（可惜九十分鐘之內打和，贏波輸錢），今晚買邊隊贏呢？好難決定。法國教練杜明尼治唔係史高拉利，唔讀孫子兵法，但熟習星座之術，揀球員要睇埋球員嘅星座，唔知佢喺決賽有乜安排。法國贏波靠施丹，三十四歲球王連搏三場勁嘅（西、巴、葡），重剩番幾多呢？對葡萄牙嗰場，施丹已經靜咗好多咯噃。意大利教練納比話施丹係二十年來最佳球員，好榮幸做過施丹教練（祖雲達斯），納比熟悉施丹一切路數，加上意大利後防極嚴密，亨利唔容易搵到空位，睇落意大利嘅贏波機會稍高一線，但九十分鐘之內打和，加時之後意大利贏波奪標！
納比有道撒手鐧，就係九十分鐘內力保不失，穩守突擊，打和冇計。加時之後，就換入迪比阿路、打四個前鋒，瘋狂進攻。意大利休息多一日，加上法國球員年紀比較大，打到加時，體力下降，德國就係如此在加時最後一分鐘輸波嘅。法國如果唔能夠先開紀錄，輸波機會超過六成。睇歷史數據，似乎意大利有利，因為意大利在一九三四、一九三八年捧盃，之後一九七○年打入決賽，輸畀巴西，十二年後一九八二，再入決賽，贏咗西德，再十二年後一九九四入決賽，輸畀巴西，又過十二年到咗二○○六，意大利再次打入決賽咯噃，多謝法國踢咗意大利尅星巴西出局，似有天意！二十四年前，意大利神射手羅斯被控打假波，估唔到今勻歷史重演，祖雲達斯、AC米蘭、拉素、費倫天拿涉及假波醜聞，祖雲達斯經理比索圖跳樓。滿城風雨之下，意大利哀兵上陣，士氣更高昂，除非施丹踢到神仙下凡咁款，左丁山認為意大利會贏，九成在加時之後。