羅家英在舞台上是威風凜凜的大老倌，跳進大銀幕裏只是綠葉，但無論是搞笑的特務達聞西或大唱《OnlyYou》的唐僧，還是一本正經地演出的《女人四十》、《我愛廚房》，無不令人擊節讚賞。當年吳君如曾邀請他拍三級片，家英哥為了阿姐汪明荃而推辭：「佢始終覺得台上面嗰個先吸引到佢。」 撰文：王連連
出身粵劇世家的羅家英，自小跟父親學舞台功架，才20多歲已成文武生，是行內大老倌。91年接拍由成龍主演電影《重案組》，漸漸活躍於大銀幕。
堂堂大老倌放下身段當綠葉拍電影，家英哥仍能令觀眾留下深刻印象，隨手拈來就有《國產凌凌漆》中的特務「達聞西」，與無厘頭的周星馳互相輝映；《我愛廚房》裏在喪妻後接受變性手術的「華姐」，更獲提名金像獎最佳男配角，還有教人忘不了他在《西遊記大結局之仙履奇緣》裏扮演唐僧大唱《OnlyYou》。
突破浮誇 演繹真情
鏡頭前從容不迫，其實家英哥也經過重重心理關口，他說：「我係個茄喱啡，最初都唔係好慣㗎，咪當係一種職業囉！粵劇入面我係個舉足輕重嘅人，但電影中我只係新人，唔會有人特別照顧你，自己都唔可以有咁多要求。」從影以來大多演諧角，家英哥說：「拍吓笑片真係冇所謂，要我做奸角都未必處理得好。如果𠵱家揀，我都想拍啲認真嘅戲，唔好太搞笑，感情真啲，唔使咁浮誇嘅。」
雖然家英哥渴望有破格演出，不過當年吳君如一個「非常突然」的邀請，也令他卻步，家英哥說：「有日君如打畀我，佢話想投資一部電影搵我拍，好似係《晚孃》咁嘅，叫我扮演老爺，入面都有感情戲，要我同一個靚女有親熱戲，都近乎色情戲㗎！最後我都係唔接，呢啲錢真係唔係我賺嘅，阿姐（汪明荃）都同我講：『唔使你三級吖，人哋用三級眼光睇都好夠喇！』」
舞台雄姿 阿姐激賞
問他汪明荃可會抗拒他演這些較庸俗角色？家英哥說：「佢始終鍾意我做大戲，覺得台上面嗰個先似番係我、先可以吸引到佢，電影入面比較草根，佢覺得我盡量都唔好接太多猥瑣庸俗嘅戲。」
前年家英哥患上肝癌，與病魔惡鬥後，人生領悟更多，現在他每星期主要活動就是打高爾夫球，或跟師奶團操操曲，早前更偕阿姐到德國欣賞世盃賽事，自在寫意。
若生命只剩下24小時，問家英哥會怎樣度過？他頓一頓才說：「我估我會唔出街，同屋企人一齊過，食吓飯傾吓偈，同埋不斷打電話畀啲舊朋友，但我唔會講我就快去，只會講吓家常便飯。對於呢樣嘢（指死亡），冇恐懼嘅，做番嗰日嘅嘢囉，唔可以成日諗住有乜事嘅，咁樣咪仲唔開心？」
攝影：陳慧安
場地提供：美麗華酒店東宮酒家
