《南華早報》有一位財經版專欄作家JakevanderKemp，立論以自由市場理念為主，有時候比《蘋果日報》嘅李兆富，孫柏文更「右」，呢位先生係荷蘭裔，母語並非英語，但一早嚟香港搵食，做記者及分析師，自然磨利佢自己嘅英語能力。記得佢有一次批評田北辰等商界，成日指責香港英語水平低落，佢話：「香港人最識得跟市場走，你班老細只要話一聲，英文掂嘅人，薪水高啲，香港人一定學好英語。你哋成日批評英語水平，又唔肯加人工畀英文好之人，究竟想點？」
此君之徹底市場論，唔可以話佢唔啱。當今大趨勢係兩文三語，唔識嘅話，想搵高人工職位，除非自己創業做老闆啦。香港人學普通話、簡體字，容易過乜，學英語就比較困難，左丁山自小英語能力差，經常俾阿媽用藤條打，邊打邊鬧：「喺香港地唔識英文就要做成世咕喱。」打得多，冇辦法唔怕痛，於是由一位考英文交白卷嘅學生變成全班考第二嘅學生，一路考到入大學，苦刨英文，當時究竟為咗乜？無非想搵到份好工而已（知道自己唔係博士材料之後）。身為過來人，左丁山好明白JakevanderKemp講乜。
所以喺星期三睇到馬會加薪，「厚英文熱綫員工」，不禁失笑。原來「馬會兼職電話投注服務員」加薪，只講廣東話嘅，每小時加薪一元，講廣東話及普通話嘅，時薪加一元，但係講廣東話及英語嘅，加薪三元──加到時薪四十八元。「馬會僱員工會」認為咁樣唔公平，變成同工不同酬，不排除示威反對。馬會就認為市場上能接聽英語嘅投注服務員比較少，故此加薪多啲，希望能吸引新人兼留住舊人。呢個解釋，十分合乎vanderKemp嘅市場論，冇唔妥吖！不滿意嘅員工，大可要求轉做英語接聽員，使乜搞示威啫，與其嘥時間參加工業行動，不如去補習吓英文或者多聽啲BBC廣播，為自己增值啦。當市場上充斥識聽英語嘅投注服務員，多到馬會唔想要嘅時候，馬會一定會搞同工同酬。