電車福音：電車屋暑期新招100杯麵沖涼按摩

暑假日日都是CosplayDay，Cosplayer又有新聚腳地！旺角新開了一間上樓漫畫Cafe，照抄日本漫畫網吧模式，員工穿起Cosplay服招呼客人，24小時提供漫畫、煲碟、上網、打機一站式娛樂，仲有得沖涼按摩，認真有噱頭。場內漫畫存書量達4萬本都未算巴閉，就連杯麵款式都多過人，有成100款選擇，1日3餐喺度醫肚餐餐有新口味。明晚深夜更直播世界盃總決賽，$30左右睇場波，兼任飲汽水、咖啡，各位電車男女係時候出動！

記者：陸伊琳　
攝影：何家亮

$30睇世界盃飲品任飲

一站式的日式漫畫Cafe娛樂無窮，本應諗住趁世界盃煞科在即，介紹吓其他娛樂好地方及優惠，點知忍唔住都要提番世界盃！因為場內設有多個獨立LCD電視，約埋三五知己嚟睇波的確唔錯：一是平，2小時每位$30左右，免費任飲汽水咖啡；二是全店禁煙，唔使去酒吧吸二手煙；三是提供獨立個室，有2人房、3人房、6人房……擁有自己的空間，比去卡拉OK租房睇波平得多。

a.好似去了日本一樣，職員着起Cosplay服，我變咗電車女？

b.場內飲品免費任飲，有咖啡、沙冰及汽水選擇。

c.十分貼題，連隻杯都選用電車男杯！

d.每個個室設有私人夾萬，免費使用。

Cosplayer新聚腳地

言歸正傳，這間漫畫Cafe打正旗號招攬Cosplayer來幫襯，員工都穿起Cosplayer服飾，同客人打成一片，置身其中有點像進入了《電車男》戲中的感覺。今日上到來眼見有幾位Cosplayer來試場，他們說通常聚會多選擇這些Cafe，環境舒適，又可睇漫畫，最重要一班志同道合者可以聚一聚，否則大熱天時遊街都幾攞命，有冷氣、有嘢飲、有書睇……都幾好Hea。

e.可選擇把隨身物品放到Locker內，自由自在地看書。

f.由於打正旗號SellCosplay，試業期間都有唔少Cosplayer上來試場。

g.全店最大間的6人個室房，電視可接駁到Now頻道。

h.場內可任看DVD及VCD，你亦可以折舊價買走。

沖涼按摩有噱頭

漫畫Cafe強調自己是首間跟足日本漫畫網吧模式的漫畫店，提供漫畫、雜誌、小說、上網、打機、煲碟等多項服務，費用以計時方式，最低消費半小時，一個價錢任玩、任Hea。佔地2千多呎的Cafe，設有不同形式的半開放個室及Open席，有榻榻米、大班椅、梳化等，我最鍾意就是他們的按摩房，一邊按摩、一邊睇書，好爽！睇到攰，又可以沖個涼，梳洗一下，服務認真細心。場內亦提供拖鞋、毛氈，有如在家的感覺，玩通宵喺度刷埋牙都得，毛巾、牙刷都有得買。仲未夠吸引？暑期新張優惠，送多15分鐘，即是畀半小時錢即可享有45分鐘服務，盛惠$7.5。