今期政治圈最熱爆嘅就係兩位阿太所引起嘅紛紛議論。首先有陳方安生上個禮拜喺港台有個「天地博客」，講言論自由，叫人上街；今個禮拜就輪到葉劉淑儀公開佢自己嗰份碩士論文，講香港普選。
陳太開咪之後，公民黨余若薇又話聽聞葉太好似會開咪。葉太到底會唔會開咪呢？真係要拭目以待。
葉太日前去亞視探舊朋友，但亞視公關同八方講，未有安排葉太上節目。至於成日俾左派同港府針對嘅港台，因為播出陳太嘅「天地博客」而備受攻擊，港台公關同八方講，其實港台近期都有接觸葉太，只要佢肯，做乜嘢形式嘅節目都有得傾，但係暫時未得到葉太正面嘅回應。
搵完陳太，搵葉太，會唔會搵埋董太同曾太呢，唔開咪，開枱都得！