外交部駐港特派員公署今日會搞開放日，為咗唔好悶親啲市民，外交部噚日畀啲傳媒睇Powerpoint試映，睇吓有乜可以改善。個Powerpoint介紹就詳細過頭，搞到有啲行家瞓着咗，但最失敗唔係呢樣，而係佢哋將「香港特區政府」，唔知係唔小心定下意識作怪，打錯咗做「香港特務政府」，真係幾有創意，唔知係咪暗示領導香港嘅曾爵士，其實係特務頭目！
搞另一種親疏有別
話晒竊聽條例仲有個幾月先通過，𠵱家都應該仲係特區政府，最快都要等下個月先變做特務政府。外交部發言人宋榮華話，今年係外交部第一次搞開放日，都係想加強同香港各界同胞嘅交流，等港人了解吓祖國嘅外交政策，同埋特派員公署嘅工作。
特派員公署之後就問啲記者有乜意見？有人問點解唔講吓中梵建交？呢個問題港人都關心喎！發言人就話，如果中梵建交有乜新進展，大家睇新聞都知啦！如果要講呢個問題，佢哋都係重複外交部嘅立場，冇新嘢可以講，總之係要堅持一個中國原則。佢之後又叫記者，如果喺開放日見到特派員呂新華，千祈唔好圍住問佢7.1遊行、中梵建交呢啲問題，因為佢哋認為呢啲唔係公眾關心嘅嘢，就算你哋問，佢都唔會答啦！
今次搞開放日個構思其實幾好，等啲香港同胞可以認識吓祖國外交，但原來淨係70幾個特邀貴賓先可以去參觀，唔係開放畀全部市民，真係另類親疏有別。外交部解釋話，呢70幾個人有學生、公務員、警員、經理同商人喎，冇辦法啦，地方細唔可以容納太多人喎。
特派員公署唔只係同市民親疏有別，原來就連噚日個試映會都係一樣，淨係一部份傳媒先有得睇，好似《信報》、《南華早報》同《蘋果》都冇被邀請。但八方有計，誤打誤撞又入到去聽。啲電視台就個個帶機去影，但講完影完，佢哋先話影嗰啲嘢唔可以出街，等啲市民有新鮮感。
