今屆世界盃王者聽日就會誕生，最後殺入決賽兩支強隊──意大利、法國誰勝誰負聽日先揭盅。今日就不如先嚟個預賽，代表意大利嘅女子足球隊將大戰代表法國嘅機械足球隊，兩隊各施絕技大顯身手，即管比較誰勝誰負為決賽前夕嘅緊張氣氛輕鬆一下。「女仔踢波？輸梗啦！」錯，現今女子足球絕不可睇小，再配合CoerverCoaching足球訓練課程，要做女版朗拿甸奴話咁易，個樣唔好似就得啦！
記者：許維雅 攝影：黃子偉、周旭文、陳盛臣
女仔踢波NoProblem！
現今社會乜都要求男女平等（不過通常都係女仔要求），足球一向被視為男性嘅運動，呢一刻都已經女子普及化。做女孩子嘅咁多要求，當然要坐言起行證明畀啲男仔睇，男仔做到嘅女仔都做到，踢波？「NoProblem.」但講到尾嗰句佢哋並非為啖氣，原因就只有簡簡單單由衷一句：「鍾意踢波因為好玩囉！」仲話踢波唔會變得粗魯，只係落場比賽要認真，平時一樣可以好斯文。
T-Futsal五人足球唔畀鏟波
最近「科化足球學校」鄺Sir覺得日本都愈嚟愈多女仔踢波，為推廣女子足球，召集咗幾位女星落場踢埋一份，喺多個商場即時召集對踢波有興趣嘅女仔一齊比賽。科技足球學校第一班嘅足球女學生都係7月2日決賽勝出得獎者。主辦人鄺Sir：「其實5人足球好適合女仔踢，一來唔畀鏟波，冇咁容易受傷，二來踢波女仔少，要召集22個人踢波都好困難，最後當然比賽時間短，又可以無限換人，啱晒體力較弱嘅女孩子。」至於岑Sir更舉腳贊成香港發展女子足球：「亞洲人體力始終差啲，女仔比男仔差別較細，女子足球比較講個人技術，發展得好，可以同其他國家有力一拼。」
足球6絕女仔亦做得到！
唔怕俾人笑、唔怕整粗對腳、唔怕落場衝撞擦傷熱愛足球嘅女孩子，對於意大利在世界盃表現都一至讚好，誓言今日先代表意大利給法國一個下馬威。即場表演幾款絕技希望嚇退機械人，至於技術如何，就由前甲組南華足球隊球員岑國培評一評、試一試。
絕招1：施丹式馬賽盤球
彤彤最欣賞技術型球員，成日睇足球直播，學番一兩招，最鍾意表演扭波，還即場表演施丹式轉身。
絕招2：控球60下
男仔識控波，女仔一樣得，機械人就一定唔得啦，Pappi就話自己經常練習嗰排可以連控60下，以大腿同腳腕「的波」控波都冇問題。
絕招3：斬角球
角球開得好，分分鐘係入球嘅黃金機會，女仔一樣可以開到靚角球，睇吓彤彤斬波斬得似模似樣，佢仲話落點最好係龍門前12至18碼。
絕招4：頭槌交波
交波除咗用腳，頭槌都可以，機械人就一定唔得，頭槌控波都有幾下板斧，頭槌最難係要接波時忍住度力。
絕招5：Mark人攔截
打5人足球，每個球員做埋防守，踢波嗰陣識得Mark人、識得攔截好緊要，Pappi（右）親身示範最正確嘅Mark人方法。最穩陣係前後腳企，左右前後交替，即使俾人過咗都方便轉身快，同埋唔會俾人「通坑渠」嘛！
絕招6：假身假腳
要防止對手攔截，假腳假身又點少得，點估機械人唔識喇啩！彤彤表演假腳又快又準，叫佢慢啲俾我哋影相都慢唔落嚟。
球員介紹：
球歷：剛剛開始。接受科化足球學校邀請，成為T-FutsalGirl代言人，落場玩過幾次。
點解踢波：雖然鍾煌唔係咩運動健將，但覺得今次有機會做代言人踢吓波，可以當做多啲運動，身體好啲。
球歷：10幾年。細個已經同男仔踢波，後來過咗英國讀書，中四開始加入足球學會。𠵱家代表大學女子足球隊。
點解踢波：細個鍾意睇《足球小將》，小學落街場同男仔踢波俾人歧視，𠵱家有啲熟咗會約埋一齊踢，愈踢愈好玩。
球歷：6年。3歲開始踢波。一有空閒時間就睇錄影帶，邊睇邊學，每星期都落街同練習足球。
點解踢波：足球以外，彤彤係花式溜冰4級、拉丁舞、乒乓波、圍棋及羽毛球愛好者，如果只可揀一樣玩會揀踢波。
球歷：3年。中一開始跟同學落屋企樓下足球場玩，玩吓玩吓覺得好好玩，舊年開始參加埋學校嘅足球訓練班。
點解踢波：踢波好玩，多變化。啲人覺得足球好易受傷，但之前打開排球，每打一下痛一下，仲痛，我情願踢波。
教練評：
教練岑國培即場評論3個妹妹球技，大讚彤彤有天份：「對冇真正上過足球課程嘅小妹妹嚟講，佢幾有天份，Pappi同阿牛都打得唔錯，有6、7分左右。不過始終基本功唔夠，要鍛煉腳腕嘅力度同速度。」
岑Sir即時叫3個女仔同佢搓波測試球技，仲即場過咗兩招控球傳波嘅技巧。
女子足球訓練班
1.上課地點：香港科化足球公園（九龍灣國際展貿中心天台訓練中心）
訓練時間：星期日下午3:00-4:30（15歲以上）、下午4:30–6:00（15歲以下）每堂1小時30分。
2.學費：每月$600（共4堂）
3.課程內容：理論課學習足球知識及態度，技術訓練接球、控球、射門、小組訓練比賽及CoerverCoaching獨有54個動作訓練等，包括適量體能訓練。採用美國及日本科化足球學校特別設計專門訓練女子足球員個人技術嘅課程，主要訓練假動作為主。
4.教練：前南華足球隊球員岑國培、郭嘉諾、甲組愉園足球隊球員兼助教列卡度及前香港女子足球隊球員關美莉。
查詢：香港科化足球學校
地扯：旺角亞皆老街113號913室
電話：26325055
網扯：www.coerver-oggo.com
何謂科化足球訓練法（CoerverCoaching）？
科化訓練法係由著名教練WielCoerver（韋爾科化）設計，被譽為「世界第一嘅足球訓練法」，主力協助青少年改良個人技術及1對1、小組比賽技巧。科化採用「球員培訓金字塔」作主要理論，分成六個階梯，「控球技巧」為基本，最適合小童由5歲開始學習。科化訓練法曾為多間著名球會及國家足總作技術指導，如中、法、日、阿仙奴、曼聯、紐卡素、皇馬、AC米蘭等。香港嘅科化教練，每年都要出外如日本、英國等科化總部上堂，學習54個動作訓練，了解幾時做、點解做、同點樣做，將技術傳授學生。
撐意大利最後召集
世界盃開鑼時，Fans們搶波衫都搶得七七八八，加上一向不少Fans嘅意大利可以有力殺入決賽，狀態大勇，表現令人讚歎。全港運動店嘅意大利波衫所剩無幾，要買番件聽日撐場睇波，都唔係間間Puma專門店有，真係手快有手慢冇！
Puma專門店（23771775）
地扯：尖沙嘴海港城2605號舖
