唔少國際足壇中人都提出過，想取消世界盃季軍戰；話呢場波冇意義，可觀性又唔高，不如等球迷集中精神睇決賽好過。不過對賭友嚟講，季軍戰都幾好賭。
淨係由78年開始，近7屆季軍戰都有3個入球以上，就知1.93倍嘅入球「大」一定要揀啦。或者大家會問，葡萄牙今屆守得好好喎，之前6場都只失2球，入球大博唔博得過。首先，德國貴為主辦國，上仗對意大利諗住守和博射12碼，點知加時完場前輸兩粒，奇連士文俾人鬧到飛起；今次係全國球迷面前，點都要打番場進攻足球，堂堂正正攞個季軍返嚟。
其實好多球員今仗都有必搏理由，前鋒高路斯雖然神射手獎座好穩陣，但都有危機；萬一亨利發癲入3粒，就拱手將金靴獎讓畀人，所以高路斯點都想博多一、兩球。德國隊長波歷克，連續兩屆冇得打決賽，心情肯定唔高興；呢位仁兄至今都未開齋，以佢腳頭，發起惡上嚟，容乜易射啲掛網波。
總入球吼4、5球
季軍戰競爭意義不大，預料今場雙方都會派遣部份後備上陣；德國已經講明，用賀夫頂替有傷嘅梅迪薩卡，賀夫簡直係後防計時炸彈，有佢扼守中路，葡萄牙唔使驚冇波入。葡萄牙又有中堅卡維奴停賽，米基爾蒙迪路又停，後防大執位，一樣好多缺口。
今仗投注策略，可以重鎚入球「大」；總入球方面，亦可以追4球、5球，上屆南韓土耳其已合力締造5個入球，94年瑞典又可以大炒保加利亞4蛋；4球有6.5倍、5球有10倍，平注買圍起都有3倍幾以上分頭。小注追吓3:2、2:3呢啲大波膽，隨時有意外收穫。
牽牛