今屆世界盃，德國好多電視台都有份直播，不過就似「太公分豬肉」，每個台播吓幾場。至於其他世盃節目，雖然個個台都有，但個人就覺得公營電視台ZDF最精采。
比利做客席主持
ZDF每逢比賽日，都喺柏林勃蘭登堡門進行live，情況好似我哋有線電視喺九龍灣搞世界盃嘉年華咁。不過，佢哋嘅節目就以齋talking為主，我哋有線就應該精采好多。不過，ZDF有個主持人叫做Klopp，佢分析比賽嘅說服力一流，簡直係我哋一班足球評述員嘅偶像。Klopp只係用支筆畫兩畫，再講解剛才比賽嘅戰術（過程與無敵比亞路相似），經佢專業分析下，現場2,000個觀眾已經拍爛手掌。
除咗Klopp外，ZDF亦有強勁嘅客席嘉賓，好似影響力不遜於總統嘅名宿碧根鮑華，以及巴西球王比利，可想而知電視台嘅號召力有幾強。
事實上，除咗齋talking節目外，德國其他電視台如RTL、ART等，都有搞笑形式嘅世界盃節目，至於搞笑伎倆大同小異，都係將有關嘅比賽片段剪輯，再配上對白或音樂，咁就可以將平時普通嘅比賽變成有內容嘅短片，相信呢個亦係全世界籌備大賽節目嘅大趨勢。
講開電視，原來呢邊都有分收費同免費兩種，不過所謂免費，其實每個月都要畀20歐元嘅稅，至於收費電視除咗交稅外，當然要畀多48歐元，所以話香港睇收費電視，其實已經好平㗎喇。
有線06世界盃嘉年華，將於明日凌晨1:00am——2:30am，播出世盃外景隊採訪滙報