侍仔：我好黑仔呀今日，南韓女友啱啱同我鬧交，又話分手又話即刻返南韓；頭先老細又話茶餐廳蝕到仆喺度，世界盃都冇錢賺咁滯，又鬧我唔拉客。
招積域：蝕錢唔關你事㗎喎，做咩事又鬧你呢？同埋你間茶餐廳坐到咁多人，冇理由蝕錢㗎？
菠蘿文：咪係囉，坐到成百人都蝕錢？定係你老細當初計錯數呢？
加時、12碼過足癮
侍仔：收費台收得我哋好貴呀！原來裝一部有收費頻道嘅電視做商業用途，最少要成幾千蚊，咁我哋呢度有7部電視，即係要幾萬蚊啦！仲有呀，你哋唔係唔知今屆賽事幾咁悶先得㗎，16強到4強都有加時，班客咪坐晒喺度囉。
招積域：唔係呀，咁樣咪好抵睇囉，50蚊人頭費坐喺度成兩個幾鐘頭，我鍾意呀！
菠蘿文：說話唔係咁講呀，我都有朋友開餐廳，又播埋波，結果佢去到嗰啲加時賽事，真係「媽媽」聲㗎！
侍仔：梗係啦，做食肆嘅最緊要來得快去得快啦，假設一場波可以做兩輪客就梗係兩輪啦，𠵱家有加時比賽，即係要我哋做少一輪，咪又係賺少咗錢囉！少一輪就真係少成萬蚊㗎！
招積域：𠵱家共有5場波踢加時，咪即係賺少咗最少5萬蚊？唔怪得之你老細鬧你啦。
侍仔：我好慘呀！
招積域：算啦，世界盃呢樣嘢好奇怪㗎，賣波衫嘅就賺錢，但食肆有好多都唔係賺太多；但唔跟風又係死路一條喎，真係難為餐廳老細。
菠蘿文：所以都係做打工仔好，有得食又有波睇，加時仲精采！
侍仔：你哋班友仔，又話兄弟，但𠵱家又係咁落井下石！我就搞唔掂我老細㗎啦，我女友可以點樣算呢？
招積域：你趁決賽嗰晚同佢去離島玩吓，即係好似愉景灣咁，又有氣氛又有波睇，到時佢就可以笑番晒啦！
高洛文