隨着巴西於8強出局，世界盃對我來說，已於7月1日提早結束，情況等同今晚的季軍戰，理應全無意義！
不過，話說回頭，今晚德國與葡萄牙亦各有理由當正冠軍戰咁打！德國隊貴為東道主，賽前飽受國內閒言閒語困擾，罪狀包括，好搵唔搵，搵個美國居民執教國家隊；其次奇連士文主政，只攻不守，冇晒傳統風格！然而，事過境遷，如今德國上下（好明顯包括女總理默克爾）都替這支充滿活力與自信的國家隊感到自豪，即使今晚只能爭季軍，相信全國球迷勢必盡地一煲為主隊打氣，球員亦會施展渾身解數答謝國民支持！
C朗令人擔心
至於葡萄牙，自「黑豹」尤西比奧為球隊取得1966年世界盃季軍的最佳成績後，表現一直乏善足陳，難得今屆躋身4強，總算為「黃金一代」兼前「世界足球先生」費高帶來點點安慰！
葡萄牙一眾戰將在「大菲」史高拉利帶領下，心理質素當然不成問題，但就上場對法國所見，基斯坦奴朗拿度一掂波即俾人噓到暈，對一向趾高氣揚的他，或許會造成困擾！今晚兩隊實屬「五五波」，希望可以放開懷抱打場多入球的精采賽事啦！
Addy商業一台《長傳急攻一粒鐘》主持
今晚播放時間：6:30pm-7:30pm