港股是日算係沉悶，恒指最多跌過41點，最叻升過57點，埋單則有進賬18點。期指跌42點，由高水49點變成低水12點。高低水幾十點，成日見。用高低水判斷大市去向，冇意義，亦好易錯，除非高低水講緊幾百點。
江銅C輪：上海期銅升停板，其實係跟隨隔晚紐約期銅急升6.3%嘅結果。江銅（358）彈升0.40元，收7.80元。江銅C輪，隻隻生猛。最叻係3838，收1.21元，升幅41%。唔係亁炒牛河，有2.5球轉手，金額近300粒。
3838明年1月中到期，溢價29.4%，槓桿率6.5倍（有效得3.3倍），引伸波幅高到68.2%。咁嘅數據追貨，好易對荷包唔住。勉強揀對象，3536比較實際。不過，江銅股價能否高企不變，有疑問，江銅C輪，搞唔過。
中鋁C輪：鋁價升，中鋁（2600）爬高兩格，收5.85元。最旺門嘅中鋁C輪2126，收32.5仙，升8%，有42球易手。
2126溢價12.4%，槓桿率18倍（有效7.6倍），引伸波幅55.5%。
隻輪下月下旬夠鐘，計落剩番29個交易日買賣，咁嘅壽命，用咁嘅溢價去買，結果又係多數對荷包唔住。
21世紀公司輪400：中信21世紀（241）升2仙，收1.09元。公司輪400由1.8仙升上3.7仙，升幅106%，有5萬份成交，金額千幾蚊。
400喺9月中到期，行使價2.40元，正股現價僅夠4成半。用千幾蚊去買1個夢，不如將啲錢去食幾隻黃油蟹。
章盛