季軍戰德國對葡萄牙。德國上場對住意大利，喺加時下半場尾段連失兩球，最終無緣問鼎今屆大力神盃。
事實上，今屆着重防守嘅球隊明顯佔優。殺入4強嘅球隊，除咗德國防守比較差之外，其餘意大利、法國同葡萄牙，都係穩守突擊出色嘅球隊，所以德國輸波亦無話好說。
德國低水唔值博
葡萄牙上場對住法國，如果唔係輸咗1球12碼嘅話，相信賽果可能會改寫。無可否認，葡萄牙今屆整體表現認真唔錯，防守力就唔使懷疑，但略嫌攻力唔夠。
好多球迷認為今場德國會贏波，攞番個尾彩，但略嫌德國讓半球低水唔值博，所以揀下盤葡萄牙。
冠軍戰意大利對法國，呢場的確係一場五五波，兩隊殺得入決賽，絕非等閒之輩。睇番兩隊晉級嘅6場賽事，以90分鐘計算，同樣錄得4勝2和嘅成績，真係冇高低之分。
我個人認為法國喺淘汰賽，贏西班牙、巴西同葡萄牙較有說服力。相反意大利只係贏澳洲、烏克蘭同德國。不過意大利嘅防守力實在犀利，除咗對美國嗰場薩卡度擺烏龍之外，其餘5場都保持不失。睇番兩隊近3次碰頭，都係和波收場。今場一於博90分鐘內和波，揀主客和嘅和。
陳樹鵬（阿鵬）
有線球彩台主持
電郵：[email protected]