世界盃就到尾聲，預計好多外地球迷都會陸續返國，不過我預計到時飛機位難求呢！其實德國人傳統上好鍾意喺暑假外出旅行，呢度嘅家長都唔似香港嗰啲咁要小朋友暑假都上興趣班，反而會成日帶佢哋出去旅行。
買定機票至穩陣
德國嘅地理位置喺歐洲中心，要搭火車、飛機同埋自己揸車去其他地方都好方便。今年世界盃，德國人都留番喺度睇波，所以都未出去住，我估計一完咗世界盃就會有好多德國人出去旅行，唔早啲買機票都唔知點出國呢！
細個嗰時屋企人都會成日帶我出去旅行，西班牙、法國同荷蘭都去過晒。去得最多都係荷蘭，因為有親戚喺嗰度住，所以我哋會揸車去嗰度同佢哋飲茶。德國人仲好流行買架旅遊汽車，因為可以喺入面住，又可以周圍去，真喺連酒店錢都慳番㗎！
袁彩雲
無綫世界盃直擊主持