時下男女愛則合，不愛即離，兒戲得好似細路仔玩泥沙。莫講話生BB，晚婚早離更見慣不怪，全球出生率下降成為社會大趨勢，全世界政府都喺度諗計鼓勵生育。人口老化，好容易會造成經濟斷層嘅問題。唔好講到咁深入，就咁講，喺街度想搵個BB望吓都難。打開8月號《Spring》，突然見到跨版媽咪同BB嘅街頭SnapShot，頓時好似見到甘泉一樣。日本出品嘅小朋友衫又Cute又靚，加上一班日本靚媽咪又肯為寶貝傾力打扮，的確賞心悅目。此外，今期另一值得取經嘅Feature係教你一件衫一條裙3日點襯法，呢類型實用教着法最能留得住讀者慢慢歎細心學，永遠萬試萬靈。《Spring》最成功之處可以搵嚟各行各業嘅靚女親身示範，做咩職業跟番邊版照抄可也。今期隨書附送X-girl布袋仔一個，實用啱使又夠潮，抵買！
