美聯新界區早排出現人事變動，有啲高層起身離場，即時俾對手中原有機可乘，攞到唔少獨家盤做，美記都反應好快，不斷調兵遣將，同提升下層員工，力拒強敵。
由於世界盃完結後，發展商會大舉出擊賣樓，係代理搵大錢嘅黃金機會，加上新界區嘅新盤都唔少，美聯班新界高層，就一齊聚聚共商大計，順便展示實力同激勵士氣。
一直做開港島豪宅嘅中半山區域營業董事何銘培，調任新界區董事，統領新界西北及沙田大埔區，佢好快已經聯同一眾董事，攞到啲大盤嘅獨家代理權，認真厲害。
豪宅王子新界殺到香港
美聯物業董事布少明話，新界區前線團結一致，誓要全力搶攻市場，贏盡全行喎。
而美記另一員猛將，就係去年底升做助理營業董事，半年間再升為區域營業董事，外號豪宅王子嘅張子存，佢專做大deal，除咗元朗加州花園同錦綉花園外，又做過唔少豪宅樓盤同物業，由新界殺到九龍同香港，包括大角嘴一號銀海、赤柱富豪海灣及薄扶林貝沙灣等豪宅，而代表作就係04年促成山頂歌賦山道28號2號屋，成交金額1.7億。
電郵地址：[email protected]