側田（Justin）首次擔正做男主角嘅新戲《戀愛初歌》會喺下月中上映，呢部戲係金牌出品，所以老闆黃柏高特別緊張，為咗谷部戲兼捧愛將，特登搵咗林子祥（阿Lam）幫手作曲畀側田唱。
能夠同偶像合作，側田梗係開心到彈起，至於好少作歌畀人嘅阿Lam，之前做晒準備工夫，問清楚側田鍾意快歌定慢歌，諗住為佢度身訂做，側田話想要首慢得嚟激昂嘅歌，結果佢就作咗首《有火》，由方杰填詞。
誇讚音域廣
阿Lam話：「Justin唱呢首歌會俾人覺得佢becomeaman，唔再係玩玩吓咁。呢首歌都幾難唱，因為音域闊，尾段差唔多高咗8度。我之前同佢喺演唱會合作過，知佢唱到，點知錄完音之後，我覺得我可能唱得冇佢咁好㖭。」
得到阿Lam大讚，側田感激對方賞識之餘，仲話覺得今次可以同偶像合作簡直好似發緊夢咁，有夢想成真嘅感覺，佢話：「錄音前一晚真係超級緊張，仲反覆聽咗隻demo好多次喇。」