4強爭標大熱門及大冷門德國及葡萄牙，組成咗季軍戰戲碼。德國隊大熱倒灶，殊非意外，事實上係打得唔夠人好；葡萄牙敗走法國腳下，就有啲令華度始料不及。雖然係咁，呢場季軍戰都係推介德國隊W。
葡萄牙球迷已四散
德國呢邊仍然有唔少國民為國家隊差一步都入唔到決賽而茶飯不思，但今日仍然要全力撐球隊拎番個季軍，攞番少少安慰。葡萄牙呢？聽講有好多專程嚟到德國捧場嘅葡萄牙擁躉，見球隊喺準決賽俾施丹一腳12碼射死之後，季軍戰都唔打算睇，即時執行李返國，或者飛去第二度玩，散吓心。
1,200港元坐一等位
始終「季軍」呢個名無乜價值，季軍戰連波飛都平過人，120歐元有得坐一等位，同分組賽差無幾。呢兩日就大把葡民周圍放飛，相信到時史特加球場入面，又係德國人天下；成日話球迷係球隊第12人，呢場波葡萄牙即係打少對手1個，點撐？
有德國外圍公司都同華度講，呢場季軍戰德國點都要攞番個尾彩；雖然德國人都係同大部份歐洲人一樣，鍾意賭馬賭狗多過賭波，但佢哋都唔敢開得德國個W太好分，怕有其他人收到風葡萄牙未必全力出擊，向佢哋追捧德國W。
文：華度