無驚無險又到周末，睇埋世界盃總決賽之後，小初就可以過番正常生活，唔使日日對住個大利市機釣魚。
雖然呢排人人都掛住睇波，但二三線股仔陸續有搞作，早兩日恒發世紀（578）公布收購煤礦，復牌首日勁升6成，跟住兩日股價大幅回吐兩成過外。昨日股價突然急升的永成國際（850）又係傳出有意發展資源業務。
永成昨日最高0.335元，收0.32元，成交股數1310萬股，金額417萬元。
永成傳有搞作其實已有一段時間，隻股上月中公布以每股0.285元，配售8600萬股，集資額2450萬元。計時間，呢批新股應該可以在市場買賣，而咁啱又舊聞重提，似乎過於巧合。認購新股班投資者，現時賬面已經有錢賺。
除永成外，久違了的陸氏實業（366）昨日亦急升9.29％，收1.53元。經紀黃話，陸氏實業向來貨疏，只要買盤稍為大些少，就可以推郁隻股。公司一早在越南投資，而呢排芬佬留意緊越南經濟，有投資者趁勢炒作並唔奇。
慕容小初