自從上周六，巴西喺世界盃輸咗畀法國，八強止步之後，行家最想見到嘅人應該係新賭王嘉華集團主席呂志和，皆因喺法巴「開戰」之前，呂主席力捧巴西，仲叫大家即管落注，輸咗佢賠。可惜至今仲未有人碰到過呂主席……
講開呂志和，近排佢嘅下屬、跟咗佢十幾年嘅嘉華集團企業事務副董事張嫚芸為老闆出咗本書，名叫《寧靜致遠──呂志和平平凡凡的人生哲學》（圖二）。為老闆出書，當然唔少得歌功頌德，包括通知各位，呂主席今年初登上福布斯全球富豪榜。
張嫚芸筆下喺商場打滾超過60年嘅呂志和，見證咗社會變遷，歷盡人生起跌，但憑藉「平凡」同「中庸」嘅價值觀，創造咗一生傳奇。至於書裏面有冇講呂志和點樣歷盡驚濤駭浪，搶到澳門其中一個賭牌，八方仲未拜讀過本書，有興趣嘅讀者自己搵答案嘞。