踩板一族對於Nike的SBAngus一定唔會陌生，近年Nike為咗力谷AirForce系列25周年紀念，完全冷落咗其他系列鞋款，今個月Nike板鞋終於返來了，代理聯同香港X-Game組織X-Federation推出全新Crossover鞋款──NikeSBAngus香港別注版，如果你係板鞋初哥，咁啱睇咗呢篇報道又愛上咗Angus系列嘅話……唔好意思！今次香港別注版將會係最後一對，隨後NikeSBAngus將會成為歷史。懶理你係唔係板友，今次都要支持吓！
記者：羅灝汶
攝影：陳偉強、何家亮
香港X-Game組織聯名
年前NikeSBAngus推出首對香港區別注版，以紅白配色為主打，估不到一年多後Nike就放棄了整個Angus系列，喺停產前，Nike決定同本地X-Game一大組織X-Federation（X-Fed）推出最後一對Angus，整對鞋的配色、設計都主要由Nike一手包辦，而X-Fed就由多位成員提出建議修改。X-Fed當中的6位骨幹成員：Warren、Ken、Conroy、Alan、Jimmy同Brian一直參與其中，但要苦等至到上個星期，才第一次接觸到製成品。
鞋身設計相當傳統，防磨麖皮少不了。而因為整個Project係為咗推動本土X-Game而設，鞋墊中間就有一大個「香港」毛筆字款，而鞋舌、鞋踭就用上X-Fed建議的5星標誌（代表尊敬祖國）及X-FedLogo。特別版又點會出得多，此鞋全港只限量推出500對。
香港代表：揀板鞋先睇外形
X-Fed同Nike都話今次Angus合作係為咗本地X-Game而設，功能上當然還是以踩板為主，今日我地就即時搵來玩板4年半，曾經於上海擊敗中國全國第一車霖，取得中國專業選手比賽冠軍嘅香港滑板代表隊成員俊仔為大家示範吓停產前的Angus有咩咁好，着住Angus玩Air、Flip有冇難度先？俊仔：「Angus鞋款已經有一段歷史，其實大部份板鞋設計都大同小異，最緊要係合使用者心水，我自己就會首先看外形，今次X-Fed呢對鞋用咗黑白、泥黃，一睇就好有街頭Feel，而且對鞋都好Sharp，對於講究鞋款外形嘅朋友會好啱，而且Angus防滑功能唔錯，亦好舒服，不過係新鞋穿得唔慣，有點刮腳。」
售賣點：8FIVE2（25739872）
銅鑼灣謝斐道506號聯誠商業中心2樓3室