今日孫柏文好想首先同大家講，我唔係一個喜歡詛咒人死嘅財經口水佬。不過今日真係要講一句：「有人揀死嘅時間，真係揀得好靚」。因為，花旗國世紀大騙局Enron嘅阿頭KenLay，心臟病發，魂歸天國。佢老人家臨死之前就被人裁決欺詐罪成立，不過佢又啱啱上訴緊，原來根據花旗國法例，如果一個人上訴期間死咗，就連原本嘅裁決都唔算數，甚至會令到法庭紀錄當中連告都未告過。對於佢老人家嘅後人，淨係慳番花旗國司法部想攞嘅4000幾萬美元，都慳唔少。所以唔好話，有時真係「死得快、好世界」！唔怪得有人傳言話佢詐死。
金正日玩沙蟹輸晒
大約兩個禮拜前，孫柏文用隻金手指為大家篤過一場世紀沙蟹局（又名「話事啤」、showhand，即係電影「賭神」、「賭聖」裏面嘅賭局）。參與者就係北朝鮮vs花旗國。北朝鮮嘅金正日同志玩呢場「世紀沙蟹」，想贏嘅係繼續有好多經濟援助，所以就「晒冷」發射新式導彈。花旗國亦不甘示弱跟住「晒冷」，話已經將反導彈系統由「試驗」狀態，變成「預備」狀態，準備睇北朝鮮張底牌究竟有冇可以成功發射嘅導彈「四條煙」。
點知道牌一開，北朝鮮就一鋪清袋，原因係北朝鮮嘅新式導彈唔掂。大家可能會問：「北朝鮮嘅導彈唔係啱啱試射成功咩？唔係有兩支導彈成功射咗去日本對開海面，嚇死啲日本人？」冇錯，金正日同志係有兩支導彈成功射咗去日本，不過呢兩支導彈係舊科技，以前已經射過，冇乜新鮮。金同志今次話到明要「試射」，舊科技邊度算數？仲有，呢場世紀沙蟹局話到明係北朝鮮vs花旗國，咁「日本對開海面」又算啲乜。呢兩支舊科技導彈，只不過係呢場沙蟹局嘅插曲。
長程導彈短過煙花
呢場沙蟹局嘅主題曲，其實係北朝鮮話可以射到花旗國嘅新式長程導彈，同埋如果成功試射，究竟花旗國嘅反導彈系統係唔係「有料到」。點知新式長程導彈一射，喺空中嘅時間仲短過我哋特區年初二嘅煙花，令到試射完全失敗。𠵱家北朝鮮少咗隻可以恐嚇世界嘅棋，首先，北朝鮮裏面一定有人人頭落地，我哋特區人民話齋「要搵人孭鑊」。我哋祖國對北朝鮮可能會冇咁客氣，因為北朝鮮嘅利用價值小咗。
最後，好多人分析話因為北朝鮮被證明「冇料到」，所以一定會再試射，希望力挽狂瀾。不過，朝鮮半島已經到雨季，天氣愈係唔好就愈多變數，如果再射又唔掂，咁就仲大鑊，因為第一次試射失敗，都只不過係支導彈唔得，如果喺倉卒嘅情況下第二次試射都失敗，咁就代表國家管理層管理不善，或者北朝鮮已經要到孤注一擲嘅地步。
孫柏文