港股又試發惡，唔理日股散202點，恒指由跌137點變為升173點，來回310點。如果夠膽兼有運，喺開市頭幾分鐘撈貨，例如0.315元買滙控熱門C輪4497，到收市40.5仙散水，已穩袋近3成利潤，腳仔搖搖矣。
個市既然咁惡，每當軟軟哋之時，就係入市買C輪良機。買大市升，可以揀恒指C輪，亦可以向最重磅股份嘅C輪埋手，喺乜嘢價位上車，臨場執生。
滙控C輪9038：9038係比較冇咁大上大落嘅滙控C輪，適合唔想賭到抹汗嘅股民玩。隻輪12月尾到期，輪價75仙，溢價2.9%，槓桿率18.2倍（有效11.3倍），引伸波幅15.2%。正股上落2元，隻輪理論變化17%。
中移動C輪4993：4993亦屬溫和派炒家啱做嘢嘅中移動C輪，12月上旬夠鐘，輪價69仙，溢價5.5%，槓桿率6.6倍（有效4.7倍），引伸波幅38%。
如果想搏殺，贏輸都大啲，則揀4451，隻輪昨日已經升咗22%。
和黃C輪3625：和黃（013）係重磅股，大市要去，和黃唔會冇份。睇位買C輪3625，10月尾到期，輪價34仙，溢價5.2%，槓桿率21.1倍（有效11倍），引伸波幅21.5%。短炒搏殺揀3832。
章盛