今時今日，除了賺女人錢容易，賺寵物錢絕對不難。喜愛小動物的03年港姐李詩韻，有意投身寵物美容師行列，現為學徒的她常以愛犬Snowy做實驗品，學習初期，試過為牠剃毛時血流如注，嚇得她半死。
香港有不少人鍾意養寵物，所以寵物店、狗餐廳，連寵物酒店都愈開愈多，幫寵物美容扮靚的店舖更加不可以缺少，03年度最上鏡及才藝香港小姐李詩韻就是吼準這個市場，打算投身寵物美容界，她說：「因為我好鍾意狗，我見到狗就好開心，美容又係我嘅興趣，所以想做寵物美容師，學吓點樣護理寵物，自己可以點整就點整。」
失手嚇親
李詩韻現在是寵物美容學徒，除了學習寵物護理知識，還不時在寵物店實習，她說：「其實幫寵物做護理係有好多步驟，好似唔同種類嘅狗，用嘅工具都唔同。學習初期，我都會搵我隻Snowy練習吓，一開始就梗係有慘痛經歷啦！記得第一次學剃毛，見到Snowy個patpat好多毛，諗住幫佢剃咗去，我之前已經搵自己隻腳試一次，然後先幫隻狗剃，點知一剃，佢叫咗一聲，跟住個patpat就係咁流血，嚇到我死，幾驚佢之後屙唔到，真係嚇到我想喊。」
經過這個慘痛經歷，李詩韻卻未有因此放棄，還經常到朋友的寵物店搵試驗品，她說：「嗰次之後，我都好小心，每次都會搵人幫我，有時遇到啲情緒唔好嘅狗，都會俾佢抓損，𠵱家學習階段，都係幫小狗做清潔護理，如果學得好，可能會去澳洲上堂深造。」
𢱑銀開舖
將來成為寵物美容師，李詩韻希望擁有屬於自己的寵物店，她說：「我咁鍾意小動物，如果有錢，想開間寵物店，因為屋企人都支持我。假若真係有能力，姐姐都會幫手打理，有屋企人助陣會事半功倍，我又可以搵錢，又有人幫我搞舖頭，咁樣諗真係好理想，所以我要努力賺錢，快啲實現夢想。」
採訪、攝影：楊潔雯
場地提供：gaiteprofessionalgroomingcenter
