德意大戰舉行前，碰到賽馬專家，德國人B先生，左丁山好識趣，喊一聲Deutschland，點知佢立即同左丁山講德文，聽到一頭霧水，只知佢嘅意思係話德國一定贏。足球係德國最流行嘅運動，賽馬B十分愛好足球，當然熱捧德國。記得三十二年前西德有碧根鮑華，武勒在陣，踢贏球王告魯夫嘅荷蘭，繼一九五四年之後，第二次奪得世界盃，西德人民好高興，但當時仍在冷戰期間，東西德分裂，西德人唔敢膽高叫「德國萬歲」。今年就唔同晒，如果贏咗世界盃，德國人將抹晒一切納粹、共產陰影，以全新姿態在二十一世紀爭雄。如果輸咗呢？都冇所謂，世界盃舉行之前，德國隊唔似巴西、阿根廷、英格蘭咁樂觀，冇乜大期望，輸畀意大利德國人仍然會高興。
世界盃係名利場所，巴西輸波，大哨細哨嘅身價立即跌，費比加斯身價即時暴漲，皇馬要向阿仙奴搶人，又要向車路士拉走洛賓！教練地位當然亦與表現有關，試問邊間一級球會肯要艾歷臣呀？巴西嘅彭利拿、阿根廷柏卡文已經執包袱，不難理解。奇連士文就奇貨可居嘞，世界盃前畀德國球圈中人鬧到死，由選人、戰術、防守、住喺加州以至聘請美國體能教練等等，乜都鬧埋。現在呢？奇連士文成為德國民族英雄，德國改革先鋒，商界視之為學習對象，佢代表德國之明天典範。
於是美國乘機搶人，想出高價搵奇連士文做美國隊教練，既然呢位大哥娶美國太太，鍾意加州天氣，做美國教練就唔使成日遊飛機河，往返德美咁辛苦啦。今年美國足球總會選出一位新會長，係印度裔、哥倫比亞大學經濟學教授，聲言在佢有生之年會睇到美國捧走世界盃。講得咁口響，向德國搶走奇連士文當然係一個好開始。美國呢鋪嚟真嘅，睇怕女總理墨克爾夫人要親自出馬，以愛國心留住奇連士文至得。呢位昔日球星從未做過教練，一做就叻過年薪五百萬鎊嘅艾歷臣咁多倍，起碼值年薪千萬美元。