萬眾期待嘅「軟硬天師LongTimeNoSee」演唱會，本來只係開27至30號四場，不過開售四個鐘就賣晒所有飛，製作單位就梗係加場啦，仲一加就加多三場，點知唔夠三粒鐘又俾歌迷掃清。近日商台製作同金牌娛樂日日都收到唔少軟硬迷嘅電話，查詢幾時會再加場。據知有關方面𠵱家都構思再為軟硬加開多兩場騷，不過一切詳情都喺商討當中，稍後先至會公布。
月尾出碟
早前主角之一嘅林海峰（Jan）接受訪問時，就講笑咁講話今次如果再加場，個騷會同葛民輝一人做一晚，有時又會兩個夾埋一齊做。點知有fans真係信以為真，打去電台問邊一場係阿Jan做、邊一場係阿葛做。其實10年冇合作嘅軟硬今次再走埋一齊做騷，又點會分開一人做一場呀。
阿Jan就已經向商台請假籌備呢個騷，佢同阿葛除咗忙住綵排之外，仲瞓身為新大碟做後期。今次軟硬仲邀請咗唔同嘅重量級音樂人幫佢製作呢隻碟，當中包括有黃貫中、恭碩良、EricKwok、前LMF成員大飛、王雙駿等等。呢兩日軟硬第二首主打歌《好兄弟》已經派台，據知大碟將會今個月21號推出。