98年之後，對於克羅地亞，你可能會認識那裏的足球，不過分分鐘連克羅地亞喺邊處都未必知道。這個被世界唔同的旅遊雜誌選為06年最熱門的旅遊地點之一的國家，因為物價比歐洲其他地方平，不過同樣位於亞德里亞海沿岸，絕對是個享受陽光海灘的好地方。
記者、攝影：梁學文
鳴謝：菁英郵輪，芬蘭航空
喺克羅地亞有唔少古樸的古城，充滿中古風味，要數最特別的，是位於東南末端海岸半島上面的Dubrovnik。呢座古城亦在1979年被聯合國列為世界遺產之一，係去克羅地亞玩必到的地方。古城建於7世紀，最初由希臘所管治，城堡建成之後，就開始發展成為一個繁盛的商業中心，曾幾何時亦是歐洲其中一個重要的貿易中心。可惜一次大地震，就將整座古城震毀，所有房屋同建築全部倒塌。後來用一模一樣的材料，以人手一件一件的重砌紅瓦屋頂，使古城的面貌重現。
好景不常，古城在1991年又經歷了一次更加慘烈的人禍。克羅地亞同南斯拉夫開戰，南斯拉夫投擲了2千幾枚炸彈，將3分之2古城堡炸毀。當地人流離失所，唔少有歷史價值的建築物都破爛不堪。有見及此，聯合國協助重建，於是又再重拾當年古城風貌，今日我哋至可以有機會親身感受古堡的風情。
古堡城牆看海
成座古城分新城區同舊城區，當中主要的古舊名勝，好似鐘樓、教堂等等都集中在舊城區，要認識當地的文化或者睇睇舊時建築，最好就去舊城區行個圈。必到的肯定係古城堡（Citywalls），在古城牆上面睇睇地中海的靚景之餘，亦可以飽覽整個古城的風景。
城牆高25公尺，長1,940公尺，全由花崗岩所砌成，臨海而建，係古時一個重要的軍事要塞。叫得做城牆，炮樓、眺望塔唔少得，我在城牆上走，由眺望塔望落去，感覺都幾似《TheLordOfTheRings》的古城堡，只是無半獸人出現攻城，淨係望到好多遊客在城內Shopping。城牆從前負責國防，如今保家衞國的責任都係留番畀軍隊。
必買！！古風手工藝
行得古城的大街，當然要買番啲古城的產品做手信，碼頭邊就有好多賣手巾仔、民族服裝的攤檔，不過要數最有特色的，係城堡入面KateStojanovic，有一位身穿古裝的女士賣的手織產品。古裝女仔叫Kate，開檔10年，以前其實係Part-time，毅然放棄銀行工作，全心全意織布擺檔，日日朝九晚七風雨不改。Kate說：「我阿嫲同阿媽教我織布，佢哋話係古城堡的文化，所以我細細個就開始學，諗住可以保存多啲呢度嘅文化。𠵱家我連正職都唔撈，主力織布，我呢套衫都係自己做。」我都愛香港的茶餐廳，不過又無Kate咁偉大到要開番間，非常佩服佢嘅勇氣。見佢咁落力，臨走前我都幫佢買了兩條手織手巾仔，睇真啲，手工又確實好精細。
必蒲！！Stradum大街
唔好以為舊城區淨係得舊時的古迹文物，其實大部份商店同餐廳都在舊城區搵得到。就好似古城入面的Stradum大街，全長3百米，兩邊全部都係Shopping好地方，亦係CoffeeShop林立的大街。喺Stradum大街逛逛，感覺就好似回到中世紀，修道院、噴水池、鐘樓等，大多是歌德式建築，就算去商店Shopping閒逛，都好有古時的感覺。
必食！！古城堡食街
沿海地區魚穫豐富新鮮係吸引之處。碼頭一帶就有唔少海鮮餐廳，食海鮮送無敵海景，一個人二百蚊港紙左右，歐洲來講都算係咁啦。嫌貴？可以去Prijeko，呢條可以話係古城堡的食街，有十幾間餐廳，由地道的海鮮到意大利菜都有。我當然食地道海鮮餐啦，St.Moritz係其中一個選擇。呢間餐廳家庭式經營，阿囡阿囝做樓面，老竇做廚，大女Kristina話：「我哋一家人一腳踢，都幾開心，最重要係可以返來古城開檔，因為爸爸一家以前住呢度，打仗先搬走。」
MYMEMO
1.當地錢好使
雖然係歐盟國家，不過克羅地亞係少數未完全轉用歐羅的地方，所以當地原來的貨幣依然通用，兌換價比歐羅仲好，所以用當地貨幣抵過用歐羅。
2.唔好正午行城牆
成條城牆長2公里，要行晒都成個幾鐘。不過千祈唔好似我咁正午去，肯定曬餐死，最佳時間係早上8點或者晏晝6點，無咁曬又有風。
出門handbook
簽證：持特區護照或BNO均不用簽證，並可在境內逗留不超過90日。
查詢：25284975（克羅地亞領事館）
郵輪：菁英郵輪千禧號15日12夜地中海古郵輪航空遊，行程包括來回威尼斯機票、接送及郵輪千禧號住宿膳食等；暢遊地中海國家如克羅地亞、意大利等多個國家。
出發日期：7月12日及8月5日；價錢$24,800起。
查詢：23161308（菁英郵輪香港代表）
網址：www.rccl-hkg.com
貨幣：1歐元約兌9.87港元，1庫納兌1.4港元
語言：克羅地亞語及英語
時差：夏令時間較香港慢6小時
電壓：220V，雙圓腳插座
長途電話國家區碼：385
旅遊查詢： http://us.croatia.hr/
遊Guide
古城堡城牆行
收費：7.5歐羅
KateStojanovic
電話：（20）321716
地址：Prijeko120000DubrovnikCroatia
St.Moritz
電話：（20）322022
地址：Prijeko3020000DubrovnikCroatia
天氣預測
今日Dubrovnik
氣溫19-27℃
濕度50%
明日
氣溫20-24℃
濕度52%
後日
氣溫21-27℃
濕度38%
3-5月：春天天氣好，開始回暖，景色優美。
6-8月：克羅地亞的夏天，天氣好到極，旅遊好時機。
9-11月：入秋後天氣轉涼，涼風送爽，繼夏天後另一個到訪的最佳時候。
12-2月：雖然係冬天，不過唔怕凍的話，去當地嘅機票同酒店會平啲。