施丹又嚟料喇！法國周三鬥葡萄牙嘅4強賽，前者憑「最後球王」施丹一球12碼，晉身決賽同意大利爭冠軍；但球王好似犯咗射12碼大忌，竟然──唔助跑！
有睇場波嘅球迷都應該留意到，施丹射12碼嗰陣，唔知係信心唔夠，定係想同葡萄牙門將列卡度彭利拿（簡稱列卡度）鬥智，竟然射之前近乎唔助跑就快快趣射，擅長撲12碼嘅列卡度捉到路兼掂到波皮都入；施丹今次一箭定江山，都算驚險咯！
猶記得阿叔（林尚義）講過；「射12碼，切忌唔助跑就走埋去射！」不過，睇完施丹之後，阿叔就補充番「其實有信心就得喇」！今次叻畀阿叔睇。
施丹喺自己最後一次嘅世界盃中，再演王者風範，連朗拿甸奴同列基美等呢啲時下最hit嘅球星都被比下去，原來背後令佢翻生嘅原因好可能係「煲煙」！施丹日前被揭發佢同門將巴夫斯都係煙鏟一名，估唔到佢踢咗十幾年波，到就嚟收山先俾人揭開呢個秘聞；但如果煙嘅威力真係咁大嘅話，施丹真係要話畀「細哨」知，自己食開咩牌子！
判官話
判官認為射12碼係要助跑先好，但係施丹係球王，你唔係，所以電視機前嘅球迷或球員就咪學喇！
信心指數：★★★★★
以5★為最高
專家話：有助跑射12碼會準啲
「有助跑射12碼通常會準些，如助步不順則可能影響射波質素，至於施丹只踏一步便射亦沒有問題，因以其級數，多數可以食得正個位，故問題不大。」（ESPN足球評述員）蔡育瑜
網民反應：個人嗜好射開咁就咁
外界對射12碼時應唔應助跑有何意見呢？「個人嗜好，有啲球員射開咁就咁。」「施丹以前都唔係咁射喎。」「助跑有用㗎，好似射波時嘅假動作就要助跑先呃到人。」
世盃判官歡迎球迷來稿
世盃判官係1個世界盃期間專為廣大球迷而設嘅欄目，球迷如對賽事有任何投訴、意見，想同我哋分享，就快啲投稿啦!來稿勿過300字。
世盃判官體育版電郵：[email protected]
體育版傳真熱線：23703534