這篇不是《夜生活》，卻跟夜生活最璀璨的砵蘭街扯上關係。入黑，頭頂的霓虹，似為砵蘭街抹上一臉艷妝，你不難發覺，這街會散發一種誘人香味，香味源自各式正菜，很多人會抵受不住本能驅使，在這條街解決生理需要，安撫自己一顆寂寞的心……別心邪，我說的，是肚餓要開飯這種生理需要而已。
記者：張一豪
攝影：陳陶鈞
模特兒：Mo（Time'sWork）
寂寞Mo仔孤獨蹓躂熱鬧的旺角街頭，逛完信和，忽然有生理需要，他想起附近的砵蘭街，不失為一個解決需要的好地方，在那裏，他可以找合心水的正菜盡情宣洩。那時天剛入黑，華燈初上，旺角街頭的霓虹招牌更見燦爛，Mo仔拖着長長的影子融入這條五光十色的繁華街道，驀地有所發現，一個美少女正拐入登打士街，朝滿幢桑拿浴室、卡拉OK夜總會的偉華大廈方向進發，心中一慄：「唔係嘛，個女仔喺呢啲地方返工？」幸好，美少女原來只走進隔鄰的「八仙樓」，他才鬆一口氣，緊隨而至解決他的生理需要──肚餓。
大廚波哥好諗頭
入店，剛才見到的美少女即問：「你好？幾位？」Mo仔有心搭訕：「一個人，你叫乜嘢名呀？」美少女自稱阿雪，附近街坊皆戲稱她「靚雪」，Mo仔打蛇隨棍上：「有乜正菜食？要好似你咁正喎？」靚雪娓娓道來：「新菜有桑拿蟹，即係金銀蒜香蒸蟹，加粉絲蒸，蒜味逼晒入蟹，又鮮又香呀；如果鍾意食新鮮刺身，冰火哈蝦笑就啱你，用生猛泰國生蝦即撈即做，好新鮮㗎；仲有味群雞亂舞，係我舅父亦即係呢度大廚波哥嘅撚手菜，一雞做足兩味，喺砵蘭街嚟講好有特色㗎……」
Mo仔正想伸手同靚雪握手，問：「啲菜名鹹鹹濕濕咁，咁有砵蘭街Feel嘅……」未問完，身後出現一股強勁氣勢，原來是揸Fit人波哥：「仲有款卜卜脆鹹豬手㖭，啱晒你喇，吓？」嚇得他未握手先縮手。波哥入行20多年，學粵菜出身，除粵菜外更擅長川辣風味菜：「話時話，我煮得又度得，乜嘢古靈精怪菜難倒我先？叫我度多幾個砵蘭街特色正菜都仲得呀。」
先解決生理需要！
冰火哈蝦笑$48
冰，說的是冰鎮；火，說的是辣汁。這道菜用的是生猛泰國生蝦，上碟時蝦頭仍然蹦蹦跳，不過老實汁不算太辣，卻能帶出蝦的鮮甜，愈吃愈想吃。
群雞亂舞$68
群雞亂舞？好鹹濕呀！菜名是鹹濕了點，說穿了不過是三丁雞加水晶雞，波哥將兩大拿手菜合而為一，有辣有唔辣，有鑊氣又有鮮味，我誠意推介。
北菇雞生子$68
波哥口中的男士恩物，藥材適合夏天食用，補而不燥，內有鮮雞子、雞肉、冬菇，湯鮮甜而滋陰，我喝光了全碗。
桑拿蟹$88
桑拿者，蒸也！金銀蒜味完全逼入蟹肉，有齊炒蟹的香與蒸蟹的甜。
卜卜脆鹹豬手$68
鹹豬手加脆漿炸，估佢唔到，外面卜卜脆，入面有咬口，加黑椒汁，超香口。
食客有Say
搵食攻略
e.新八仙樓海鮮酒家（27701111）
地址：旺角砵蘭街109號地舖 營業時間：5:00pm-5:00am
交通：油麻地地鐵站A1出口 座位：200個 人均消費：$80-$100
最好賣：焗魚腸、沙薑雞腳、泰式話梅豬手伴泰式辣汁等全屬搶手菜
有着數：近期推出特價世界盃套餐，$168包1條約1斤重老虎斑、2款指定小菜、３支啤酒，均除3人約$60落樓，抵到爛
再歎事後啡！
啡常好Hea
食完正餐，Mo仔膽粗粗約靚雪過對面街的「想入啡啡」歎「事後啡」，靚雪心郁郁：「見你個樣都唔似壞人，同你過去Hea吓啦。」Mo仔大獻殷勤，除大杯到好似巨型花樽的沙冰外，又點了Handmade蛋糕。瞬間一枱食物，見靚雪心花怒放，Mo仔出招：「咁大杯沙冰你飲唔晒嘅，不如一齊飲咯？」靚雪也不笨：「咪嘞，我飲細細杯咖啡，沙冰留番畀你啦。」
鐵板虎蝦配西冷$88
泰式冬蔭功炒飯$55
12安士新西蘭牛扒配一隻中虎蝦，份量十足；炒飯微辣，每一啖都很香口，兩款都是套餐，有前菜、餐飲和甜品。
Cappuccino$28
沙冰（普通$30，花樽$45）
咖啡用差不多貴一倍的意大利Calaluna咖啡豆製成，香濃不澀；拍拖推介各口味花樽Size沙冰，比普通Size大一倍，抵。
Handmade蛋糕$28
Handmade蛋糕甜而不膩，是不少女生的至愛，我愛吃朱古力Expresso味蛋糕，貪其夠香夠滑。
搵食攻略
d.想入啡啡（23833338） 地址：旺角砵蘭街116號地下
營業時間：周一至周四12:30pm-1:00am；周五及周六12:30pm-3:00am；周日及公眾假期3:00pm-1:00am
交通：油麻地地鐵站A1出口 座位：20個 人均消費：$20-$30
最好賣：雞翼、Homemade蛋糕、鮮果沙冰
掃Guide圖
