逢打格鬥Game嘅人都會話：「唔畀少少學費練招，點出嚟街機同人隻抽呀？」查實，同類遊戲亦曾出現唔少盲拳打死老師傅嘅案例，其中一隻就係《鐵拳》！出到第5集之後，首次進軍手提機行列嘅《鐵拳DarkResurrection》，除保留靚畫面、亂㩒亦可出招等特色之外，佢仲支援免UMD無線對打，只需要1隻UMD足以通街搵人開戰，湊腳開戰話咁易！
記者：陳國輝
幾乎每隻PSP遊戲都可作無線對打，但講到其中一方免UMD嘅話，則相當罕見！今次，《鐵拳DR》「破例」支援GameSharing，只要雙方都喺Wi-Fi傳輸範圍內（約20米），即可連線進行VSBattle模式！試玩仲發現，Connect速度非常快，唔使8秒已經撈到畫面，而且打緊嗰陣動作好流暢，極少窒格。但係，有玩家就嫌冇UMD嗰一方欠缺儲存戰績記錄、Movie以及戰利品。回心一諗，若果冇Game都俾你玩齊咁多嘢，仲成世界嘅！
靚3D再添3角色
一直有玩家擔心，呢隻Game移植自街機嘅《鐵拳5》，因PSP機能問題，落到手提機會唔會令質素差咗？先講畫面，3D圖形屬該遊戲命脈，小記發現狗牙情況唔嚴重，尤其當你睇見風間飛鳥、凌曉雨等玲瓏曲線身段時，更會為PSP嘅高畫質讚不絕口。另一抵讚嘅，係製作人喺場景上花咗唔少心思，例如戰鬥時地面造成嘅灰塵、撞爆木箱時產生嘅碎片等，均做得非常細緻，而今集仲加入日夜場景變化，畫面夠晒豐富！
人物設定一直係《鐵拳》系列強項，今集除咗玩人多，更會新加入1女2男新角色，包括Lili、SergeiDragunov以及ArmorKing，總數超過36人！喺唔同嘅Mode入面，每位角色依然有各種服飾畀你更換，玩盡頭飾、上衣、皮帶、手套等種類，搞到好似玩Barbie咁，非常盞鬼！
Lili
石油王獨女，自從一宗意外令佢突然愛上格鬥，後來當知道三島財團舉辦格鬥比賽之後，佢就下定決心要參加。
SergeiDragunov
一次軍事行動中發現咗不明生命體，被運送研究所之後，佢突然變成擁有超強戰鬥力嘅異人，稱為「白之死神」。
ArmorKing
身世一直係個謎，特點係全身由鋼鐵包實，並擁有超強嘅戰鬥能力，但佢究竟係咪以前嘅King，咁就冇人知道。
新增鐵拳道場打聯賽
既然移植自街機，當然唔少得「街機模式」以及「故事模式」2種傳統玩法。不過喺PSP版本入面，就加入多一項名為「TEKKENDOJO（鐵拳道場）」嘅全新Mode！開初玩家只係一名格鬥初哥（入門生），根據每場戰鬥經驗所得，你會慢慢升級，並學識各種新招式，再向更高Level嘅對手挑戰；最過癮嘅係電腦會自行幫你安排對戰時間表，仲會根據你嘅能力排列名次，玩法類似足球聯賽咁，連細欄都分做「LEAGUEMATCH」及「RANKINGTOURNAMENT」，擺明打車輪戰！至於勝出得多嘅話，除咗名列前茅、獲得更多招式之餘，仲會有好多隱藏迷你遊戲。例如會突然多咗隻保齡球MiniGame，裏面可選用任何1位角色進行比賽，雖然唔算係大突破，但比起街機版總叫加入咗新元素。
小技巧：10分鐘爆機
小記雖然唔係《鐵拳》Fans，但試玩過一陣之後，亦發現咗所謂嘅小秘技，話唔定對班「入門生」有啲幫助！假如你揀選風間仁出戰，佢其實有1招好易出嘅攻擊技（上＋正方掣），能將敵人打到彈開，每次你只要離遠等佢衝埋嚟，再吼準時間出招，咁成功率就相當高。小記試過最快10幾分鐘即完成1個StoryMode，只為儲道具、儲Movie嘅話值得試吓！
PROFILE
遊戲類型：3D格鬥
對應機種：PSP
遊玩人數：1人（可Wi-Fi對戰）
開發廠商：BANDAINAMCOGAMESInc.
行貨售價：$278