樓市仍然係反覆向下，面對生意難撈嘅現狀，同埋睇唔通嘅前景，代理行業都頭痕緊，悲觀派嘅，或者係開舖開得太多嘅，都醞釀緊執位變陣減輕負擔，尤其係一啲租約到期，業主大幅加租嘅舖，即使係靚位都要忍痛撤走。
雖然有人無鞋挽屐走，但亦有人漏夜趕科場，世紀21奇豐喺自己地頭馬鞍山，開到第8間分行，新舖係海栢花園商場馬鞍山廣場2樓，行人天橋入口旁嘅1300呎旺舖，前租客係香港置業，據講新租約月租要6位數字，喺好多行家緊縮開支嘅情勢下，奇豐呢次真係好勇。
奇豐董事李峻銘話，佢哋喺馬鞍山廣場已經開到第3間舖，新舖預算今個月中開張。呢個靚舖食到正商場出入人流，唔少行家都虎視眈眈，落標競爭都好踴躍，但係佢哋極之睇好下半年馬鞍山個市，換樓客市場同埋全新項目嘅推出，都好有潛質推高個成交量。
奇豐現時有16間舖，喺世紀21體系內都算龍頭行之一，其中8間喺馬鞍山，沙田區有6間，仲有2間喺西貢，現有員工130人。李峻銘話，西貢市中心間舖啱啱換咗個大位，今個月底沙田馬鐵第一城站1500呎大舖亦會開張，加埋馬鞍山廣場新舖，佢哋會額外請多30人。
電郵地址：[email protected]