今年IT界最潮興嘅，肯定係「高清」莫屬。呢種將影像科技推上另一層次嘅新產物，涉及範圍之廣超出你我想像，由電視、播放機、電腦、影碟甚至遊戲機都有份，幾乎所有軟件、硬件均可參一腳，商機大到無倫，全球IT產業均以此為努力目標，情形比早幾年嘅MP3及卡片DC熱潮，更係高上幾班。
全球廠商努力參一腳
儘管日本仔好幾年前已有高清玩意，不過其消費模式實在過高，要真正全民高清，單靠日本好難成事。目前全球IT業開始大力催谷；HDDVD及Blu-ray兩大高清影碟制式已出籠、Plasma突破技術做到高清解像度、WindowsVista都加入HDCP高清輸出標準，就連香港喺07年亦開始作出數碼廣播（是否高清尚屬未知之數），加上高清電視降價速度愈嚟愈快，好多人開始入市，呢股熱潮真係不可小覷。
跟老行尊福田講開高清影碟，佢都認為最終Blu-ray會贏，論點都幾有Point，就係年尾PS3登場後，就算賣價偏高，頭幾個月賣過2、3百萬部都應該冇問題，SONY單單拎住呢個銷售數字，已足夠拉攏各大廠商加盟Blu-ray陣營，始終HDDVD播放機想喺短時間內有咁大市場佔有率係好難嘅，因為明顯地HDDVD目前仍未做到價格上嘅優勢，由播放機到燒碟機，以及儲存用嘅「吉碟」，價格上都跟Blu-ray差不多，暫時計HDDVD仍未有甚麼優勢，所以PS3的確係推動Blu-ray嘅強大支援，除非PS3面世後出現不可原諒嘅「鑊氣」啦。