民建聯有錢係人都知，噚日佢就喺年輕人潮地apm商場公布偉大嘅東南九龍發展計劃建議。民建聯覺得政府唔應該主力起個體育城，而係要諗吓點樣幫助周邊協同地區發展。不過睇落佢個設計好似玩SimCity咁，都幾有型，真係唔知會唔會好似apm咁，創下另一個翻身神話，定係會步西九後塵，潮到搞唔成。
民建聯為咗個計劃，都擺咗好多錢請規劃師重新規劃，仲整個靚靚模型，又搵胡應湘出意見，夠晒豪。大嗱嗱一個接近成廿億嘅重建計劃，陳鑑林就好輕鬆咁話政府只需要出錢起個沙灘同觀光塔，其他嘅自然有商界包，不過佢始終唔肯講個造價係幾多。成班記者擁住個模型問長問短，陳鑑林唔知係咪開心得滯，連亮燈儀式都唔記得咗。