經紀黃果然有料到，大快活（052）昨日公布業績果然靚仔，盈利比去年勁升1倍，有7500萬元。雖然話有1690萬元來自出售物業的特殊盈利，但就算唔計呢一筆，盈利升幅都非常可觀。
大快活昨日一度高見7.10元，收6.95元，升2.21％。下個星期二輪到大家樂（341）出業績，唔知有冇大快活咁正斗呢？無可否認，兩間快餐店無論裝修同埋食物，都比以前進步好多。
同樣係食品股，但搞送餐的福記（1175）自從上周公布業績，盈利上升52％後，股價一直下跌，確實令人費解。一直力捧福記的里昂，昨日忍唔住走出嚟唱好，話投資者誤會福記，以為佢哋毛利率下跌。
福記的毛利率由前一個年度的44％，下降至最近的39％，原因只係因為年內大幅增加產能，而產能又未能在一時三刻悉數用盡，相信有關情況會隨住福記拓展客戶組合而得到改善。福記昨日升3.1％，收13.30元。
慕容小初