所謂行行出狀元，原來經紀都可以做教師，祥益地產有個topsales袁思賢Joise，最近兼職做埋持續進修課程嘅導師，親自開班傳授銷售技巧，平日扯刁開單都已經搏到盡，仲咁有教學抱負，名副其實係經紀狀元。
Joise入咗行接近十年，主要跟屯門區大炒家，好似鬍鬚余就係佢嘅常客。早排佢將自己應付投資者嘅經驗，歸納為一套教學心得，向香港學術評審局申辦為持續進修課程，最近獲批，遲吓就會親自授課，名為「發掘與跟進投資者」。
另外，喺宣傳培訓課程方面，一向都好積極嘅香港置業，佢哋嘅「開單心法」課程，最近一堂嘅導師，就請嚟新界西助理區董區宇彥，佢將自己嘅成功心得歸納為三點，取名為「A.S.K」，即係心態（Attitude）、技巧（Skill）同埋知識（Knowledge）咁解。
睇嚟，經紀行內，真係潛藏唔少教師人才喎。