我阿利𠵱家冇嘢撈，周遊列國，要定期寫稿真係有啲頭痕。所以，大家見我如果有一排冇寫，咪以為我已經兩腳一伸，返咗去舊時嗰度。除咗周遊列國，我阿利仲會周不時去香港會會員吧，同啲老友打吓牙骱，食吓個咖喱，為免與時脫節也。呢日同啲大行老細吹水，有人講起政府要搞呢個公平競爭法，即時令各位伯爺公講到收唔到口。
查實公平競爭，響資本主義社會真係唔知存唔存在，尤其是係大陸特色嘅資本主義市場。以我阿利呢行為例，響大陸，個job係你唔係你，真係有時要講運數，邊有話公平競爭吖！
我老友阿陳，響四大行之一做咗廿年老闆，見盡人間滄桑，最留意時事政治。佢呷一啖啤酒，一輪嘴話乜嘢叫反競爭行為。一聽，我哋班老嘢即時跌低，皆因條條犯晒。
例如割喉減價，呢行做嘢定價真係隨我哋呢班老細話事。橫掂燈油火蠟夥計人工是已出之物，只要個job有戰略考慮，一於割價求job。割喉式咪算小兒科，狼起上嚟，割大動脈都未驚過。
又或者濫用市場優勢，咁就真係冤枉大老爺。阿陳佢做開啲銀行股做到開晒巷，真係唔搵佢搵邊個。呢個市場優勢唔用，唔通留番嚟煲醋？如果咁又叫反競爭，嗰啲乜乜物物專家咪要收檔？
吹完一輪水，我阿利真係執番身彩，早退休幾年。以我當年遇神殺神，肯定被人投訴反競爭。